Бир кечада 275 миллион доллар гонорар эгаси, энг кўп нокаут, 2 ярим метрли гигант... Улар кимлар? Профессионал бокс энг зўр статистика эгалари билан танишинг

Профессионал бокс оламида йиллар давомида фаолият олиб бориб, ҳозирги кунда имконсиз бўлиб туйилган статистикага эришган жангчилар талайгина. Мана шундай боксчиларни сизга таништиришга қарор қилдик.

Энг ёши катта чемпион

Бернард Ҳопкинс бокс тарихидаги энг ёши катта чемпион бўлган. У 49 ёшида ҳам чемпионликни қўлга киритган. Шунингдек у, юқори даражада жанг қилган ёши катта боксчи сифатида тан олинган.

Энг кўп профессионал мағлубият

Ушбу йўналишда Регги Стриклендга "тенг келадиган" боксчи топилмаган. У профессионал боксдаги фаолияти давомида 363 та жанг ўтказиб, шулардан 276 тасида мағлубиятга учраган.

Энг бўйи паст оғир вазн тоифасидаги чемпион

Одатда оғир вазнли боксчилар анчгина бўйдор бўлади. Профессионал бокс тарихидаги ушбу вазнда энг бўйи паст чемпион Томми Бёрнс саналади. Унинг узунлиги 1,70 см бўлган ва чемпионлик камарини 13 бора муваффақиятли ҳимоя қилган.

Энг оғир чемпион

Профессионал бокснинг оғир вазн тоифаси жангчилари ичида чемпионликни қўлга киритган энг оғир боксчи Николай Валуевдир. Унинг бўйи 213 см бўлса, оғирлиги 148 кгни ташкил этган. "The Russian Giant" тахаллуси остида рингга кўтарилган ушбу боксчи ҳамюртимиз Руслан Чагаев томонидан таслим этилганини ҳам эътироф этиш жоиз.

Энг кўп чемпионларга эга давлат

Бокс глобал спорт тури бўлса-да, унинг энг қайнаган ўчоғи Америка Қўшма Штатлари ҳисобланади. Шунингдек, ушбу давлат энг кўп чемпионларга эга. АҚШдан шу вақтгача 431 та чемпионлар етишиб чиққан. Бу кўрсаткич иккинчи ўриндаги Мексикадан деярли 3 баробар кўп демакдир.

Чемпионларни энг кўп мағлуб этган боксчи

Бокс оламида бу борада Флойд Мейвезер етакчилик қилмоқда. У профессионал фаолияти давомида 50 та жанг ўтказган ва мағлубиятга учрамаган. Шулардан 23 тасида чемпионларни мағлуб этган.

Энг кўп ғалаба қозонган боксчи

Ҳамма ҳам бу борада етакчи бўлишни истайди. Аммо Лен Уикварнинг рекордини такрорлаш осон эмас. У фаолияти давомида бир ойда бир неча маротаба жанг ўтказган. Қўлпопларини михга илганида у жами 467 та жанг ўтказиб, шулардан 339 тасида ғалаба қозонган эди. Унинг бу натижасини нафақат такрорлаш, балки яқин келиш ҳам ҳозирда мушкул.

Энг бўйи паст чемпион

Боксда бўйнинг баланд бўлиши пастроқ рақибга нисбатан анчагина устунлик тақдим этади. Лекин Жек Матлалага бу фактор ҳалал бермади. Ўта енгил ва биринчи ўта енгил вазн тоифасида 147 смли собиқ WBО чемпионига рақиблари бу борада муаммо туғдира олмаган.

Бир вақтнинг ўзида 3 вазн чемпиони

Гарчи ҳозирда чемпионлик камарлари анча кўп бўлсада, бу ишни уддалай олганлар топилганича йўқ. Тарихда Ҳенри Армстронг бир вақтнинг ўзида 3 та вазнда чемпионлик камарларини сақлаб турган боксчи сифатида ном қозонган. У нафақат чемпион, балки ўз вазнларида мутлақ жаҳон чемпиони мақомига ҳам эга бўлган. У биринчи енгил, енгил ва ярим ўрта вазнларда камарларни ўзиники қилиб турган.

Энг кўп нокаут қайд этган боксчи

Энг кўп нокаутли ғалабага эга бўлиш бокс оламида ҳар ким орзу қиладиган статистика десак муболаға бўлмайди. Бокс тарихида ушбу номни Билли Бёрд эгаллаб турибди. У фаолияти давомида 356 марта жанг ўтказган. Ғалабали жангларининг 138 тасида рақибларини нокаутга учратган. Ушбу рақамлар ҳозир шунчаки нореал дек туюлади. Бугунги кундаги актив боксчилар орасида нокаутлар сони 51 тани ташкил этади. Шундан келиб чиққан ҳолда айтиш мумкинки, Билли Бёрднинг статистикаси ҳали "хавфдан холи".

Энг ёш чемпион

Барча соҳаларда бўлгани каби боксда ҳам тажриба муҳим ўрин тутади. Лекин бу боксчи ўзини бундан истисно эканлигини исботлаб берди. 1976 йилда 17 ёшли Уилфред Бенитес Антонио Сервантесни мағлуб этган ҳолда энг ёш жаҳон чемпионлик камари эгасига айланган.

Мағлубиятсиз фаолиятини якунлаган ягона оғир вазн вакили

Оғир вазн тоифасида зарбалар оғир эканини инобатга олсак, нокаутли мағлубиятлар қайд этилиши эҳтимоли ҳар доим мавжуд. Аммо бу эҳтимол Роки Марсиано учун бегоналигича қолди. У фаолияти давомида мағлубиятсиз қўлқопларини михга илган ягона оғир вазн тоифаси вакили ҳисобланади. Унинг рекорди 49-0 кўриниш олган эди. Ҳозирга WBC чемпиони Тайсон Фьюри 30-0-1 ва WBА, IBF WBО, IBO камарлари эгаси Александр Усик ушбу натижани такрорлаши мумкин.

Энг узун боксчи

Бўй ва қулоч кенглиги боксда айни қўл келувчи воситалардан бири ҳисобланади. Руминиялик Жорж Миту энг бўйи баланд профессионал боксчи бўлган. Унинг бўйи 2,41 метрни ташкил этган. Лекин у атига икки марта жанг ўтказган ва ҳар иккаласида муддатидан олдин ғалаба қозонган.

Оғир вазн кўп карра мутлақ жаҳон чемпиони

Бир маротаба мутлақ чемпионликка эришиш ҳар бир боксчининг олий мақсадларидан бири саналади. Бу сен ҳар бир йўналишда чемпионлик камарини қўлга киритдинг дегани. Бокс олами афсонаси Муҳаммад Али бу борада 3 катта мутлақ жаҳон чемпионлигини қўлга киритди ягона оғир вазнли боксчидир. У ўз даврида Сони Листон, Жорж Форман ва Леон Спинксларни мағлуб этган ҳолда 3 бор бу номга сазовор бўлган.

Энг узоқ давом этган баҳс

Аввалги даврларда бокс қоидалари бироз бошқача кўриниш олган. Ушбу жанг ташкил этилганда ғалаба қозонишнинг ягона йўли фақат нокаут қайд этиш эди. 1893 йилда ўтказилган Энди Боуэн ва Жек Барки жанги энг узоқ тўқнашув сифатида тарихга муҳрланди. Ушбу жанг 110 раунд бўлиб ўтган ва бу 7 ярим соат вақт давом этган. Барки жангда ҳар иккала қўлини синдириб олган ва баҳс якунланган вақтда иккала боксчилар ҳам деярли 4 ярим килограмм вазн йўқотган.

Энг кўп вазнда чемпион

Фаолият бошланганиданоқ то якунлангунига қадар 8 вазнда жаҳон чемпионлик камарини қўлга киритган ягона боксчи филиппинлик Мэнни Пакьяо саналади. У бу борада етакчи бўлсада, лекин бир маротаба ҳам камарлар бирлаштирувчи жангда рингга кўтарилмаганлиги ҳам бир статистика.

Энг катта гонарар

Ҳар бир боксчи ўз жанги ва машҳурлигидан келиб чиққан ҳолда маблағ ишлаб топади. Пул ҳақида гап кетганда боксда Флойд Мейвезер эсга олинади. Унинг Конор Макгрегорга қарши жангда олган маблағини ҳали бошқалар бир жангда қўлга киритгани йўқ. 5 вазнда собиқ жаҳон чемпиони ва UFCнинг собиқ икки дивизион чемпиони ўртасидаги жанг, шубҳасиз, мухлисларнинг катта қизиқишига сабаб бўлди. Буни 4.3 миллионта сотилган пуллик трансляция ҳам исботлаб беради. 11-раундда техник нокаут эвазига ғалаба қозонган Мейвезер бу баҳс орқали ўз ҳисобини 275 миллион долларга бойитиб олган.

bolavip.com асосида Жалол Ахмедов тайёрлади