Bir sportchi – bir tarix: Muvaffaqiyatga eltgan yo‘l!

Shaxmat olamida hind yulduzi sifatida porlayotgan Rameshbabu Praggnanandhaa o‘zining iste’dodi, mehnati va oilasining, ayniqsa onasining tinimsiz yordami bilan butun dunyoni qoyil qoldirmoqda. Uning kar’erasi, hayot yo‘li, opasi Vaishali bilan bo‘lgan aloqalari va oilasining fidoyiligi bunga yaqqol misol.

Praggnanandhaa 2005 yilda Hindistonning Tamil Nadu shtatida, Chennai shahrida tug‘ilgan. Oilada shaxmatga ilk qadam qo‘ygan kishi aslida uning opasi Vaishali edi. Praggnanandhaa esa opasining izidan borib, donalarga mehr qo‘ya boshlagan. Shaxmat bo‘yicha iqtidor tez orada namoyon bo‘ldi — u atigi 10 yoshida xalqaro ustasi unvonini qo‘lga kiritdi va dunyo bo‘yicha eng yosh grossmeysterlar safidan joy oldi.

Opasi Vaishali: Raqobat emas, ilhom manbai

Vaishali Rameshbabu ham shaxmatda yuksak darajaga erishgan sportchi. U Xalqaro Grossmeyster (IM) va Ayollar Grossmeysteri (WGM) unvonlariga ega. Aka-uka emas, opa-uka bo‘lishlariga qaramay, ularning o‘rtasida kuchli do‘stlik va sog‘lom raqobat mavjud. Praggnanandhaa ko‘pincha ommaga bergan intervyularida “menga birinchi ilhomni opam bergan” deb ta’kidlaydi.

Ularning birgalikda Hindiston sharafini xalqaro arenada himoya qilgani, jahon shaxmatining eng kuchli vakillari bilan bellashgani — nafaqat sport, balki oilaviy birlik timsoliga aylandi.

Kar’erada o‘sish: Magnus Karlsen bilan jang va dunyo tan olgan iste’dod

Praggnanandhaa shaxmat olamining “super-yulduzi” Magnus Karlsenni 2022 yilda onlayn musobaqada mag‘lub etgach, butun dunyo e’tiborini tortdi. Bu g‘alaba uni nafaqat Hindistonda, balki xalqaro miqyosda ham mashhur qildi.

2023 yilgi "FIDE World Cup" musobaqasida esa u finalgacha etib bordi va yosh yigit sifatida Jahon chempioni unvoniga yaqin turgan kam sonli sportchilardan biri bo‘lib qoldi.

Nagalakshmi — sukunatda suyanadigan tog‘

Ammo barcha e’tiborni jalb qilgan yutuqlar ortida Praggnanandhaa’ning onasi — Nagalakshmi turadi. U bolalarining har bir safarida, har bir musobaqasida ularning yonida. Ko‘plab sportchilar murabbiy, psixolog yoki yordamchilarga tayanar ekan, Praggnanandhaa o‘zining ichki kuchini onasidan olishini yashirmaydi.
Ko‘plab intervyularda Praggnanandhaa o‘z muvaffaqiyatlarini “onamning tinimsiz sabr-toqati va yordamisiz imkonsiz edi” deya tan olgan. Nagalakshmi ko‘pincha mediyaga chiqmaslikni afzal ko‘radi, ammo uning mehrga boy, g‘amxo‘r mavjudligi oilaning yuksalishida asosiy omil bo‘ldi.Onasi uni sog‘lom ovqat bilan ta’minlagan, hissiy jihatdan ko‘maklashgan va hattoki dunyo bo‘ylab musobaqalarga u bilan birga safarga chiqqan. Praggnanandhaa va Vaishali’ning so‘zlariga ko‘ra, onasi ularning “jim, lekin kuchli tayanchi”.

Kelajakka qarash: Yangi marralar sari

Bugungi kunda Praggnanandhaa hali 20 yoshga ham to‘lmagan bo‘lishiga qaramay, xalqaro maydonda kuchli grossmeyster sifatida e’tirof etilgan. Opasi Vaishali bilan birga ular Hindiston shaxmatining kelajagidir. Ularning hikoyasi — iste’dod va mehnat, mehr va fidoyilik, va eng muhimi — oilaning qo‘llovi orqali erishilgan g‘alabalarning yorqin timsoli.

                                                                                                               Xolboeva Noilaxon.