Биринчи лига иштирокчиларини саралаш бошланди

Биринчи лигада иштирок этиш истагида бўлган жамоалар сони йилдан йилга ошиб бормоқда. Хусусан, 2025 йилги мавсумда Биринчи лигада 30 та жамоа тўп сурганди.

Лига сайтига "Биринчи лига регламенти" лойиҳаси жойлаштирилган бўлиб, унинг 8.2-бандида Биринчи лигада қатнашиш истагида бўлган жамоалар учун белгиланган мезонлар келтирилган. Талабгорлар ушбу банд билан танишиб чиқиши ва шу асосда Лигага расмий мурожаат йўллаши сўралади. Ўз навбатида, Лига келиб тушган мурожаатларни ўрганиб чиққан ҳолда, иштирокчи жамоаларни Устави ва регламентлари асосида саралаб олади.

Биринчи лигада иштирок этиш истагида бўлган, юридик шахс сифатида давлат рўйхатидан ўтган ёки унинг алоҳида таркибий бўлинмаси сифатида ташкил этилган футбол клуби қуйидаги ҳужжатларни info@pfl.uz
 электрон почта манзилига юбориши лозим:

клуб раҳбар органи томонидан имзоланган иштирокчилар сафига қабул қилиш тўғрисидаги расмий ариза;

футбол клубининг таъсис ҳужжатлари ва унинг фаолиятини тартибга солувчи ҳужжатлар нусхаси;

клуб раҳбар органининг тайинлангани ёки сайлангани тўғрисидаги ҳужжат нусхаси;

мусобақа доирасидаги уй учрашувларини ўтказиш учун мулк ҳуқуқи ёки ижара ҳуқуқи асосида фойдаланилиши кўзда тутилган стадион тўғрисида маълумот;

клуб раҳбар органи ва клубнинг контакт маълумотлари: телефон рақамлари, расмий электрон почта манзили;

клуб қандай тарзда молиялаштирилиши тўғрисида асослантирилган ҳужжат;

мавжуд бўлган тақдирда, клуб қошида фаолият юритаётган футбол мактаби тўғрисида маълумот.

Юқорида кўрсатилган ҳужжатлар клубнинг расмий электрон почта манзили орқали юборилиши лозим. Ариза ва унга илова қилинган ҳужжатларда камчиликлар аниқланган тақдирда ёки Лигада қўшимча саволлар юзага келса, Лига мутахассислари клуб билан боғланади.

Клубда саволлар туғилган ҳолатда, info@pfl.uz
 электрон почта манзилига мурожаат қилиши ёки 94 621 21 41 (Лига юрисконсулти), 90 189 89 98 (Биринчи лига менежери) телефон рақамлари орқали боғланиши мумкин.

Лига иштирокчи жамоаларни саралашда регламент лойиҳасининг 8.2-бандига таянади. Талабгорнинг ариза юбориши унинг Биринчи лигада иштирок этишини англатмайди ва унинг қаноатлантирилиши кафолатланмайди. Ҳар қандай ҳолатда ҳам талабгор Лига томонидан қўйилган талабларни ўз вақтида ва тўлиқ бажариши шарт.

Лига 31 январдан кейин келиб тушган аризаларни кўриб чиқмайди. Февраль ойининг дастлабки 10 кунлигида келиб тушган аризалар ўрганиб чиқилиб, Биринчи лигада иштирок этиш эҳтимоли мавжуд бўлган клублар саралаб олинади. Кейинги босқичда мазкур клубларга Лига Устави ва ҳужжатлари асосида белгиланган тартибда кириш ҳамда қатнашчилик бадалини тўлаш учун муддат белгиланади. Молиявий талабларни ўз вақтида бажарган клуб Лига аъзолигига қабул қилинади.

Бу ҳақда ЎзПФЛ хабар берди.