"Биринчи лига клуби Суперлига жамоасини уриб қўйди!"

Ўзбекистон Профессионал футбол лигаси бош директори Диёр Имомхўжаев ўзининг телеграмдаги каналида Ўзбекистон кубогининг гуруҳ босқич 1-турида "Андижон II" ўз майдонида "Олимпик"ни (1:0) мағлубиятга учратгани борасида фикрларини билдириб ўтди.

"Яқингинада ҳатто Биринчи лигада йўқ клуб Ширин газ сервис раҳбарларининг ташаббуси билан Андижон II номи остида лигамизда пайдо бўлди. Ўзбекистон Coca-cola кубогининг Тошкентда ўтган саралашида асосини Андижон футбол академияси тарбияланувчилари ва битирувчилари ташкил қиладиган бу жамоа кетма-кет уч ғалабани қўлга киритиб, гуруҳ босқичига йўл олди.

Гуруҳ босқичидаги рақиблар ёмон эмас — Турон, Олимпик, Шўртан. Ёш футболчилар тажриба тўплаши учун ажойиб имконият.

Хуллас, мана шу клуб бугун Олимпикни қабул қилиб, 1:0 ҳисобида устун келди. Яъни, Биринчи лига клуби Суперлига жамоасини уриб қўйди (!). Таркибнинг аралаш экани эмас, натижа тарихда қолади. Аслида Олимпик захирасида ҳам яхши йигитлар бор, улар U-21 чемпионатида бемалол ўйнаяпти. Шу йигитларнинг кучи бугун Андижондаги футбол академиясига етмади. Париж-2024 йўлида жам бўлган жамоага битта яхши академия қаршилик кўрсата олиши чўҳ гўзал иш. Катта ғалабалар кичик муваффақиятлардан бошланади. Бундай ўйинлар киши кайфиятини кўтаради.

Мана шундай академия 2018 йилда 14 та ҳудудий бирликнинг ҳаммасида биттадан очилганди. 4 йил давомида бу академиялар катта кучга айланиши керак эди. Кейин эса улардан маҳорат мактаблари ясамоқчи бўлишди.

Президентнинг 3610 қарори асосидаги бу 14 та академияга вилоят ҳокимлари катта ёрдам берган. Биз уларни янги босқичга олиб чиқишни ва ҳаммасининг устида Андижон II каби лойиҳаларга асос солишни истаймиз. Ишонамизки, тез орада бунга эришамиз ҳам", - деб ёзди Имомхўжаев.