Биринчи турнинг марказий ўйини ёхуд "Нефтчи" чемпионлик йўлидаги илк қадамини ташлайди

"Мавсум-2025" старт олди. Илк турнинг марказий тўқнашувларидан бири Тошкентда "Бунёдкор" - "Нефтчи" жамоалари ўртасида бўлиб ўтади. Табиийки, ушбу баҳсга ҳам қизиқиш катта.

Таркибида катта номлар ва етакчилар билан тўлдирган "Нефтчи"нинг мақсади чемпионлик саналади. Бу йўлда улар дастлабки қадамни ташлашади. Рақиб эса жиддий - "Бунёдкор" ҳам янги мақсадлари сари ўз юришини бошлайди. Мазкур жамоалар ўртасидаги беллашувлар азалдан жуда жиддий ва муросасиз кураш остида ўтиб келган.

Уларнинг ўртасидаги ўзаро ўйинлар статистикаси ҳам қизиқарлидир. Миллий чемпионатимиз доирасида фарғоналиклар "Бунёдкор" клуби билан 30 марта юзлашган. Буларнинг 8 тасида "Нефтчи" қўли баланд келган, 18 та учрашувда "Бунёдкор" устун бўлган, 4 та беллашувда эса жамоалар муроса кўчасини танлаган. Тўплар нисбати 23-43 тошкентликлар фойдасига.

"Нефтчи" бошқарувига Виталий Левченко келгач фарғоналиклар "Бунёдкор"га қарши Суперлига ва Кубок ўйинлари доирасида 6 та учрашув ўтказган. Шулардан 4 тасида "Нефтчи" ғалаба қозонган, яна 1 та дуранг ва 1 та мағлубият қайд этилган. 

2024 йил 3 ноябрда "Бунёдкор" клуби Фарғонада "Нефтчи"дан 2:1 ҳисобида мағлубиятга учраган бўлса ҳам, кейинги 3 та учрашувни мағлубиятсиз якунлаган. "Нефтчи" жамоаси ўтган йил мавсумининг сўнгги 10 баҳсини мағлубиятсиз ўтказишга эришган. 

Жамоаларнинг Тошкентда бўлиб ўтган охирги 5 учрашув натижалари қуйидагича

01.06.2024.
"Бунёдкор"-"Нефтчи" -  0:3
28.10.2023.
"Бунёдкор"-"Нефтчи" - 2:1 
08.09.2022.
"Бунёдкор"-"Нефтчи" - 1:2
12.07.2018.
"Бунёдкор"-"Нефтчи" - 2:1
15.09.2017.
"Бунёдкор"-"Нефтчи" - 2:0

Эслатиб ўтамиз, "Бунёдкор" - "Нефтчи" учрашуви бугун, соат 20:00 да бошланади.