Bizda jiddiy ravishda futbolchilar etishmovchiligi bor - Asror Aliqulovning muammolar girdobidagi "Sho‘rtan"da qolishiga nima sabab?

Pro-liga klublari ham yangi mavsum uchun astoydil tayyorgarlik ko‘rib bormoqdalar. Bu borada sports.uz sayti orqali ham imkon qadar jamoalarning yig‘inlari va yuz berayotgan o‘zgarishlar xususida siz aziz o‘quvchilarga ma’lumotlar berib boryapmiz.

Bilasiz, FIFA tomonidan O‘zbekistonning bir qator klublariga yangi o‘yinchilarni transfer qilish bo‘yicha ta’qiq qo‘yilgan. Ana shunday jamoalarning orasida “Sho‘rtan” ham bor. Afsuski, g‘uzorliklar oxirgi yillarda moliyaviy muammolar va qarzdorliklar bo‘yicha mavqeini biroz tushirib yubordi. FIFAdan qo‘yilgan ta’qiq esa klub uchun yana bir og‘ir zarba bo‘ldi. Lekin bu ta’qiq “Sho‘rtan” uchun o‘tgan yili qo‘llanilgan. Haligacha jamoaning ushbu muammosi bartaraf etilgani yo‘q.

Gapning ochig‘i, bunday muammolari ko‘p jamoada ishlash murabbiy uchun juda og‘ir. Chunki yangi o‘yinchi olish imkoniyatidan mahrum bo‘lgan klubda ishlashni aksariyat murabbiylar xohlamasa kerak. Lekin Asror Aliqulov mana shunday qiyinchiliklarga qaramay, bu klubda ishlashga rozi bo‘ldi. O‘tgan yili ham G‘uzor jamoasini boshqargan mahalliy mutaxassis aynan Asror Chorievich edi. Yangi mavsumda esa uning ham boshqa klubni boshqarishi kutilgandi. Lekin yakunda Aliqulov yana “Sho‘rtan” bilan yangi shartnoma tuzishga qaror qildi.

Shunday qilib, murabbiy muammolar girdobida qolgan jamoani yana boshqarishda davom etyapti. Qanday qiyinchiliklar bilan kurashayotganini esa murabbiyning o‘zi biladi. Sports.uz muxbiri bilan muloqot davomida Aliqulov chempionatga ko‘rilayotgan tayyorgarlik, tarkibdagi muammolar va nima uchun “Sho‘rtan”da qolgani haqida gapirdi.

“Tarkibimizda ko‘plab bo‘sh pozitsiyalar bor”  

- “Sho‘rtan” jamoasini qiynayotgan birgina muammo – bu ta’qiq masalasi, - deya gap boshladi, Aliqulov. - Biz endi o‘zimiz uchun kerakli o‘yinchilarni jamoaga taklif qila olmayapmiz. Qaytanga, tarkibdagi o‘yinchilarni saqlab qolish oson emas. “Sho‘rtan”ga o‘zining tarbiyalanuvchilarini qo‘lga kiritishiga ruxsat bor. Shuningdek, o‘tgan yilgi tarkibda to‘p surgan futbolchilar bilan shartnomani uzaytirib, ularni saqlab qolish imkoniyati ham mavjud. Hozirgi vaziyatda biz jiddiy ravishda futbolchilar etishmovchiligiga duch kelganmiz. Natijada tarkibimizda ko‘plab bo‘sh pozitsiyalar bor. Afsuski, bizda o‘yinchilar tanqisligi kuzatilyapti. “Sho‘rtan” akademiyasida ishlar ancha sust bo‘lganligi uchun katta jamoani tarbiyalanuvchilar hisobiga to‘ldirish ham qiyin kechyapti. Ayniqsa, pro-liga saviyasidagi futbolchilarni topish “Sho‘rtan” uchun og‘ir bo‘lyapti. Shunga qaramasdan izlanyapmiz va tarkibni iqtidorli yoshlar bilan to‘ldirishga harakat qilyapmiz. Bilasizmi, ayni kunda jamoamizning 50 foizini 20 yosh va undan kichik bo‘lgan futbolchilar tashkil qilyapti. Ko‘ryapmiz, pro-ligadagi boshqa klublar nafaqat Superligadan balki, bir qator legionerlarni ham olib kelishyapti. Bu esa pro-liganing saviyasini oshiryapti. Ishonamanki, bu yilgi chempionat mavqei ancha kuchli ko‘rinishda bo‘ladi. Hammasini bilib turgan holda qiyinchiliklarga qaramay, imkon qadar tarkibni shakllantirish harakatida bo‘lyapmiz. To‘g‘risi, pro-liga saviyasidan tushib ketmaydigan darajada munosib jamoa tuzishga kurashyapmiz. Tayyorgarligimiz borasida ayniqsa, tashkiliy tomonlama qiyinchiliklar yo‘q. Asosan futbolchi etishmasligi yuzasidan jiddiy muammolarga duch kelyapmiz.

“Taqiq echilmasa, yoshlar bilan o‘ynashga majburmiz”

- Taqiq o‘tgan yili qo‘yilgan. Lekin ungacha jamoaning qarzdorligi 3-4 yil davomida bo‘lib kelgan. Klubning bosh homiysi vaziyatni ijobiy tomonga o‘zgartirishga harakat qilyapti. Bu borada yig‘ilish ham bo‘ldi. Taqiqni bartaraf etish bo‘yicha harakat bor. Bu qancha tez hal bo‘lsa, biz uchun shuncha yaxshi. Ana shunda kerakli o‘yinchilarni taklif qila olamiz. Agar taqiq cho‘ziladigan bo‘lsa, boshqa imkonimiz yo‘q. Yoshlar bilan o‘ynaymiz. Bo‘sh hududlarga o‘yinchilar qidiryapmiz. Agar taqiq yaqin kunlarda echilmasa, bu mavsumda yoshlar bilan o‘tkazishga majbur bo‘lamiz.

“Dinamo”ning taklifini qabul qila olmadim, chunki...”

- Ha, menga taklif bor edi. Samarqandning “Dinamo” jamoasidan chorlov bo‘lgandi. Buning uchun menga ishonch bildirgan klub rahbariga minnatdorlik bildiraman. U menga jamoani topshirmoqchi edi. Baribir men qashqadaryolikman. Shuning uchun ham bu erda qoldim. Ularga mening qarorimni to‘g‘ri tushunishlarini iltimos qildim. Shuningdek, “Sho‘rtan”da qolishimning yana bir sababi, bilasiz, Shamil Yarulin boshchiligida yangi rahbariyat kelgan. Jamoa atrofida yaxshi murabbiylarni va kollektivni yig‘a olgandik. Klubdan ketib qolmasligimga o‘shalarni sabab qilib aytishim mumkin. Holbuki, “Sho‘rtan”dagi sharoit, oylik maoshlar, ta’qiq, umuman hammasini yaxshi bilardim. To‘g‘ri, o‘tgan bir yil davomida ozmi-ko‘pmi, jamoani shakllantirishga harakat qildik. Qilgan mehnatlarimiz zoe ketmasligi uchun ham klubda qolishga qaror qildim. Bizga qiyin bo‘lishini bilamiz, shu bois hech nimadan nolimaymiz. Baribir oxirigacha jamoani tayyorlashga hamda munosib o‘yin ko‘rsatishga harakat qilamiz. Bizda bundan boshqa yo‘l ham yo‘q.

“Pro-ligada jon saqlab qolish maqsadi qo‘yilmaydi”

- “Sho‘rtan”ning oldiga pro-ligada jon saqlab qolish maqsadini qo‘ymaymiz. Futbolchilarni qisqa vaqt ichida bo‘lsa ham tayyorlashga intilyapmiz. Lekin hozir aytganimdek, ligada qolish maqsadi qo‘yilmaydi. Garchi muammolar girdobida bo‘lsak ham, har bir uchrashuvda g‘alaba uchun harakat qilaveramiz. “Sho‘rtan”ning kuchi nimaga etadi va nimalarga qodirligimizni aytish qiyin. Hammasi o‘zimizning qo‘limizda. Yoshlarimizni tayyorlab boryapmiz. Ularning pro-ligada tajribali futbolchilar hamda legionerlarga qarshi o‘ynashga intilishi katta. Ammo, tan olamiz, tarkibimizdagi yigitlarda pro-liga saviyasida to‘p surish borasida tajribalari yo‘q. Faqat o‘ziga ishonsa va qanaqadir kuch topa olishsa, nimadir qila olishimiz mumkin. Biroq mavsum boshlanmasidan avval kimdandir qo‘rqsak va imkoniyatni berib qo‘ysak, unda jamoa shakllantirishning qizig‘i ham qolmaydi. Yigitlarimiz yosh bo‘lishiga qaramay, tezroq o‘zlariga bo‘lgan ishonchni oshirishlari lozim. Bu borada ishlayapmiz, - deb so‘zini yakunladi bosh murabbiy.