"Бизни шиддатли ва курашларга бой ўйин кутиб турибди" - Диёр сўнгги тур олдидан нималар деди?

1 декабрь куни Coca-Cola Суперлигада сўнгги 26-тур учрашувлари ўтказилади. Гарчи бунгача чемпион номи ҳамда лигани тарк этган клублар аниқланган бўлишига қарамай, қолган ўринлар учун, айниқса, кумуш ва бронзани қўлга киритиш имконияти жамоаларда сақланиб турибди ва ҳозирча унинг эгалари аниқ эмас.

Шу нуқтаи назарда олиб қараганда, охирги тур ҳам ўзига яраша аҳамиятга эга. Бунинг учун иқтидорли мутахассислардан бири Диёр Мирзабоев жуфтликлар бўйича ўз фикрлари билан ўртоқлашди.

15:00. Сўғдиена - Сурхон

“Сўғдиёна” жамоаси охирги турда “Насаф” меҳмони бўлди ва бир очкога эга чиқди. “Сурхон” эса “Пахтакор”га имкониятни бой берди. Жиззах жамоаси охирги тур ўйинида мухлисларни ғалаба билан хурсанд қилишга ҳаракат қилади. Мусобақа жадвалида 10-ўрин учун курашади. “Сурхон” ғалаба қозонса 6-ўринни эгаллайди. Вазиятдан келиб чиқиб имкониятларни 40\60 деб баҳолайман.

15:00. Андижон - Бухоро

Бу йилги мавсумни ажойиб тарзда ўтказаётган “Андижон” жамоаси чемпионатда 6-ўрин учун курашмоқда. Албатта, бунинг учун “Сурхон” ҳам очко йўқотиши керак бўлади. “Бухоро” жамоаси аллақачон Про лига иштирокчилари қаторидан жой олиб бўлди. Ўйинга келсак, “Андижон” ғалаба қозонади.

15:00. Қизилқум - Турон

5 декабрь куни “Қизилқум”ни муҳим баҳс кутиб турибди. Ушбу ҳолатни ҳисобга олиб, “Қизилқум” иккинчи таркиб билан ўйнаш эҳтимоли бор. “Турон” жамоаси ҳам бу ўйинга босимсиз етиб келиши аниқ. Имкониятларга келсак, 50\50 деб баҳолайман.

15:00. Металлург - Олимпик

“Металлург”да ҳам мусобақа жадвалида бир поғона кўтарилиш имконияти мавжуд. Биринчи даврадаги “Металлург” жамоасини “Олимпик” устидан чиройли ғалабасини ҳисобга олиб, имкониятларни 60\40 деган бўлардим.

17:15. ОКМК - Насаф

Охирги турда мусобақа жадвалида 2-ўрин учун кураш кетмоқда. Ҳар иккала жамоа ушбу турдан олдин Осиё Чемпионлар лигаси доирасида ўйин ўтказишди. Ушбу турга ҳам бир хил ҳолатда етиб келишди, деб ўйлайман. ОКМК жамоаси ўз майдонида ўйинни ўтказаётганини ҳисобга олиб имкониятларни 60\40 дейиш мумкин.

17:15. Пахтакор - Бунёдкор

“Пахтакор” чемпионликни қўлга киритганидан кейин жамоада иккинчи уйғониш рўй берди. Сафарда “Ал-Айн”ни мағлуб этди. Кўп йиллик ушбу жамоаларни охирги турлардаги баҳсларига аҳамият қаратсак, “Пахтакор” чемпионликдан кейин “Бунёдкор” жамоасига мағлуб бўлганини гувоҳи бўламиз. Ушбу баҳсда “Бунёдкор” жамоаси ғалаба қозонади, деган фикрдаман.

17:15. Навбаҳор - Нефтчи

Водий дербисида “Навбаҳор” ғалаба қозонса ва “Насаф” жамоаси мағлубиятга учраса, наманганликлар 2-ўринни эгаллаши мумкин. “Нефтчи”да ҳам назарий жиҳатдан совриндорлар қаторида бўлиш имконияти сақланиб турибди. Бизни шиддатли ва курашларга бой ўйин кутиб турибди. Имкониятларга келсак, 50\50.

Шуҳратбек Жўраев.