"Бобур Арена"да қойилмақом муҳит ёхуд "Андижон" амалдаги чемпионни қандай енгди?

Суперлиганинг 21-турида Андижонда кутилганидек супер тўқнашув бўлиб ўтди. “Бобур Арена”да шу куни қойилмақом муҳит ҳукм сурди. Ёдингизда бўлса, биринчи даврада Тошкентдаги учрашувда жамоалар 1:1 ҳисобида дуранг қайд этгандилар. Бу сафарги баҳс ҳам иккала жамоа учун ғоят муҳим ҳамда аҳамияти жиҳатидан жуда юқори эди.

Ўзбекистоннинг амалдаги чемпиони “Пахтакор” охирги пайтларда қора чизиққа тушиб қолди. Сентябрь ойини ғалабасиз якунлашди. Бош мураббий Максим Шацкихга танқид тошлари отилаётгани сабаби айнан шундан. “Андижон” эса етакчиларга қарши беллашувларда ажойиб ўйин намойиш этиб, улардан очколар тортиб олаётгани ҳам айни ҳақиқат. Буни бу сафар ҳам “Бобур Арена”да кўрдик.

Ўйин шу қадар жанговор ва шиддаткорона ўтдики, вақт жуда тез ўтиб кетгандек туюлди. Тан олиш лозим, “Андижон” бош мураббийи Александр Хомяков шогирдларини мазкур муҳим учрашувга ҳар томонлама пухта тайёрлай олди. Бутун баҳс мобайнида майдон эгалари ўзининг ранг-баранг ҳужумлари, чиройли ҳаракатлари ва албатта жамоавий бирдамлиги билан барчада илиқ таассурот қолдирдилар. Рақиб Ўзбекистон ифтихори ва чемпиони – “Пахтакор” бўлишига қарамай, “Бургутлар” ўз парвозини чиройли тарзда амалга оширди.

Шу куни “Пахтакор” таркибида илк бор беларуслик дарвозабон Павлюченко дебютини ўтказди. Айтиш лозимки, у баҳс мобайнида жамоасини бир неча бор голлардан сақлаб турди, ўз сейвлари орқали. Бироқ учрашув охирларида “Андижон”нинг албаниялик тўпурари Рубин Хебайнинг фантастик зарбаси олдида барибир ожиз қолди. Тажрибали ҳужумчи олис масофадан тўпни ўзига ўнглаб олган ҳолда шунақанги аниқ зарба йўлладики, унинг қаршисида дарвозабон ожиз қолди ва ушбу гол учрашувнинг том маънодаги безагига айланди.

“Андижон” биринчи бўлимда ҳам ва айниқса иккинчи бўлимда ҳам қатор хавфли ҳужумларни содир этди. Жамоавий сифатида катта куч билан олдинга ташланиш, голли имкониятларни яратишда ҳам Хомяков жамоаси ажойиб ўйнади. Футболчилар ғалаба учун борини бердилар ва якунда бунинг учун ғалабани қўлга киритган ҳолда ажойиб тарзда мукофотландилар.

Яна бир гап: шу куни “Андижон”нинг асосий ўйинчиларидан бири Фарҳод Бекмуротов ўзининг таваллуд кунини нишонлади. Буни қарангки, футболчи туғилган кунида “Пахтакор”га қарши тўп сурди. Табиийки, унинг учун энг олий совға бу шубҳасиз “Андижон”нинг “Пахтакор” устидан эришган ғалабаси бўлди.

Дарҳақиқат, “Андижон” жамоаси ўзининг энг яхши ўйинларидан бирини намойиш этиб, мухлисларига шоду-ҳуррамлик улашди, ҳамманинг кайфиятини тоғдек кўтарди. Шу билан бирга чемпионатдаги интригани янада жонланишига сабаб ҳам бўлди. “Андижон” турнир жадвалида юқори ўринлар учун курашишга муносиб эканини ва ҳақли эканини ҳам кўрсатмоқда. 

“Андижон” – “Пахтакор” – 1:0 (0:0).

8 октябрь. Андижон. “Бобур Арена” стадиони. 10584 томошабин.

Ҳакамлар: Комилжон Расулов, Расулжон Фозилов, Максим Нехочин.

Назоратчи: Жаҳонгир Саидов

Комиссар: Бекзод Арипов.

“Андижон”: Игорь Литовка, Абдувоҳид Ғуломов, Ислом Маматказин, Владимир Бубанья, Илҳом Алижонов, Муҳаммадкарим Тоиров, Илҳом Абдуғаниев (Суҳроб Бердиев, 82), Фарҳод Бекмуротов (Леван Арвеладзе, 67), Сардор Азимов (Сардор Абдунабиев, 82), Армин Бошняк (Фарҳод Соҳибжонов, 82), Рубин Хебай (Шаҳбоз Эркинов, 90+6).

“Пахтакор”:  Павел Павлюченко, Ҳожиакбар Алижонов, Одил Ҳамробеков, Шахзод Азмиддинов, Фарруҳ Сайфиев, Мэтью Стинворден, Диёр Холматов, Достон Ҳамдамов (Дилшод Саитов, 66), Сардор Собирхўжаев (Муҳаммадали Ўринбоев, 85), Псемишлав Банашак (Беҳруз Асқаров, 85), Пўлатхўжа Холдорхонов.

Гол: Рубин Хебай, 84 – 1:0.

Огоҳлантиришлар: Владимир Бубанья, 89 – Достон Ҳамдамов, 20. Шахзод Азмиддинов, 44. Псемишлав Банашак, 67.

“Андижон” матбуот хизмати.