Бобур Омонов: Жамоамизга ҳам, мураббийга ҳам омад етишмаяпти

Айни пайтга келиб учта ўйиннинг барчасида йирик ҳисобда ютқазган ҳолатда Суперлигамизда яққол аутсайдер бўлиб турган “Бухоро” жамоасида гарчи муваффақиятсизликларга қарамай, таркибида яхши савиядаги футболчилари ҳам борлигини айтишимиз лозим. Бироқ мураббийлар уларнинг ҳаммасидан ҳам фойдалана олишмаяпти.

Гап шундаки, айнан дастлабки учта турда “Бухоро”га ёрдам бера олмаган футболчи сифатида ҳимоячи Бобур Омоновни эътироф этсак арзийди. Балки ҳимоя чизиғида унинг йўқлиги ҳам жамоасининг муаммолар гирдобига тушиб қолишига сабаб бўлгандир. Ўз навбатида маҳаллий ишқибозларни ҳам нима сабабдан дастлабки баҳсларда Омоновнинг майдонга тушмаганлиги қизиқтираётганди. Вазиятга ойдинлик киритиш учун эса футболчи билан боғланганимизда аслида нима бўлганини тушунтирди.

- Биринчи навбатда шуни айтишим керакки, февралнинг охирлари, март ойининг бошларида йиғин пайтида жароҳат олганим сабабли оёғимни операция қилдиришга мажбур бўлгандим. Мана, ҳозир аста-секин тикланиш машқларини бажаряпман. Ҳозирда ўзимни анча яхши ҳис қиляпман, - дейди Омонов.

Жароҳат ва албатта операция сабабли футболчи ўз жамоасининг ўйинларини четдан кузатишга мажбур бўлган. Шу ўринда мағлубиятли ўйинларни четдан кузатганида жамоасининг майдондаги муаммоли ҳолатлари янада яхшироқ кўриниши мумкин. Натижада ушбу футболчидан муваффақиятсиз учрашувларнинг сабаби билан қизиққанимизда шундай фикр билдирди:

- Менимча, жамоамизга дастлабки турларда омад етишмади. Шу билан бирга ўйинлар чоғида футболчиларимизда азарт ҳам камлик қилди. Аммо “Бухоро”да бошқа ҳамма нарса яхши. Ички муҳит ҳам жойида. Ҳеч қандай муаммо йўқ. Шунчаки, ижобий натижаларга эришиш учун жиддий ҳаракат қилиш лозим.

Шундай экан, Бобур Омонов бундай салбий натижалар вақтинчалик эканлигини, чемпионат баҳслари яна давом эттирилса, жамоасининг ишлари юришиб кетишини таъкидлади.

- Чемпионат энди бошланди. Яна бироз вақт ўтгач, жамоадаги йигитлар бир-бирини янада яхшироқ тушуна бошлайдилар, - дея гапини давом эттирди Омонов. - Барибир йиғинлар пайтидаги ўйинлар билан расмий учрашувлардаги ўйинларнинг катта фарқи бор. Бундай ҳолатларда икки хил ўйин бўлади. Умид қиламанки, биз учун ҳаммаси яхши томонга ўзгаради. Дарров пашшадан фил ясамаслик керак. Ишонаманки, жамоамизнинг мағлубиятли старти тасодиф.

Қолаверса, бундай салбий натижалардан сўнг бош мураббийга жиддий танқидлар билдирилди. Балки футболчилар Муҳаммадиевнинг нимани хоҳлаётганини унинг қўли остидаги ўйинчилар яхши тушуна олмаётгандирлар. Ёки бўлмаса мураббий билан футболчилар ўртасидаги муносабат кўнгилдагидек эмасдир?! Лекин бунга жавобан Омоновнинг фикрлари қарама-қарши бўлди.

- Бош мураббий билан муносабатимиз яхши. У ҳаракатчан. Аммо жамоамизга ҳам, мураббийимизга ҳам омад етишмаяпти-да. Муҳаммадиев билан ўтган йилдан бери бирга ишлаб келяпмиз. Унинг биздан нималарни талаб қилаётганини яхши тушуниб турибмиз. Фақат “Бухоро”га янги келган футболчиларнинг янада мослашиб кетишлари учун бироз вақт керак бўлади. Ўйиндан-ўйинга футболчилар бир-бирига мослашиб кетадилар. Ана шунда жипслашиш ҳам яхши бўлади.

Маълумки, салбий натижалар туфайли бош мураббий масаласида унинг эгаллаб турган курсиси қимирлаб ҳам қолганди. Бобур Омонов эса ҳозирча бунинг ҳожати йўқлигини, асосийси майдонга чиқиб ўйнаш ҳамда ғалаба қозониш зарурлигига эътибор қаратди.

- Бош мураббий ўзгариши мумкинлиги ҳақида эшитгандек бўлдим. Бироқ менда бу борада аниқ маълумот йўқ. Лекин ҳозир бундай гап-сўзларнинг мавриди эмас. Майдонга чиқиб ўйнашимиз ва ғалабалар қозонишимиз керак. Чунки майдонда футболчилар ўйнашади, - деди жароҳатидан фориғ бўлаётган футболчи.