Боксчи-блогер Жейк Пол 24 декабрь куни рингга қайтади
Манзил – Дубай
Машҳур блогер ва боксчи Жейк Пол 24 декабрь куни Дубай шаҳрида навбатдаги жангини ўтказишини маълум қилди.
"Мен йиллар давомида одамларга янглишганини исботлаш учун ҳаракат қилдим. Кўпчилик ҳеч қачон учрашмайди деб ўйлаган рақибларга қарши рингга чиқдим ва таваккал қилдим. Юз берган ҳеч бир воқеа ўзимга бўлган ишончимни ёки мақсадларимни ўзгартирмади.
Мен ҳар қачонгидан ҳам кўпроқ ғалабага чанқоқман. Шунинг учун 24 декабрь куни Дубайда рингга қайтиб, фаолиятимнинг янги саҳифасини очаман.
Дубай — катта ўйлайдиган, қолипларни бузадиган ва чегараларни тан олмайдиган шаҳар. Қайтишим учун бундан муносиб жой бўлиши мумкин эмас.
Ҳозирда бир нечта эҳтимолий рақиблар бор. Келинг, улардан қайси бири шартномага имзо чекишини кўрамиз. Рождество муборак, Дубай! Санта Пол шаҳарга келяпти ва кимнидир нокаут кутмоқда", — деди америкалик.
Эслатиб ўтамиз, Жейк Пол ўтган йилнинг декабрь ойида Энтони Жошуага қарши жангда олтинчи раундда техник нокаут билан мағлуб бўлган эди. Ўша беллашувдан кейин Жейк Пол икки жойидан синган жағи сабаб жарроҳлик амалиётини ўтказган.
Изоҳлар (0)