“Боруссия” Холанд бўйича сўнгги қарорини айтди

Дортмундликлар ҳужумчиси Эрлинг Холанд энг харидори кўп футболчи ҳисобланади. Европанинг энг қудратли клублари уни олиш учун ёзда катта харажатларга тайёр.

“Боруссия” аввалига уни сотиб юборишни режалаштираётган эди. Лекин кейинчалик вазият ўзгарди. Бу ҳақда клубнинг спорт директори Себастьян Кель маълум қилди.

- Холанд келаси мавсумни ҳам Дортмундда ўтказади. Ўзи шунга рози. Мен уни ҳар куни кўраман ва биламанки, у ўзини клуб билан боғлаган, - деди Себастьян Кель.

Маълумки, яқинда  Эрлингнинг отаси унинг агенти Мино Райола билан Испания ва Англия гранд клублари билан музокара ўтказган эди.

Холанднинг “Боруссия” билан шартномаси 2024 йилнинг 30 июнигача давом этади. Ҳужумчи жорий мавсумда Бундеслигада 26 та учрашуда 25 та гол урди ва еттита голли пас оширди.