Бошкович жамоаси тўхтатадими ёхуд Суперлигада ҳали ютқазмаган "Нефтчи" "Сўғдиёна"ни Фарғонада қачондан бери ютолмаётганини биласизми?

Водийда яна бир юқори темпдаги ўйин кутмоқда. Бу сафар Фарғонада “Нефтчи” Жиззахнинг “Сўғдиёна” жамоасини қабул қилади. “Нефтчи” клуби ўтган турда қандай қаҳрамонлик кўрсатганини биласиз-а? Улар Тошкентда “Ўзбек классико”сида “Пахтакор” майдонида ўта қимматли ғалабани қўлга киритиб қайтди. Фарғоналик мухлислар бу ғалабани қандай нишонлаганини эшитган ёки кўрган бўлсангиз керак. Кайфияти юқори даражада бўлиб турган фарғоналикларни энди “Сўғдиёна”га қарши баҳс кутяпти.

Рости, “Нефтчи”нинг бўлажак рақиби ҳам анойи эмас. “Сўғдиёна” иккинчи даврани яхши бошлади. Аввалига “Бунёдкор” майдонида жавобсиз иккита гол эвазига муҳим уч очкони қўлга киритган бўлса, ўтган турда яна Тошкентда бу сафар “Олимпик”га қарши голлар шоусида 3:3 ҳисобида жанговар дуранг қайд этди. Қисқаси, Иван Бошкович “Сўғдиёна”да ўзининг футболини яратяпти ва рақибларга жиддий бош оғриғи вазифасини бажаряпти.

Шундай экан, Фарғонадаги “Истиқлол” стадионида оддий ўйин бўлмайди. Қизиғи, Суперлигада жорий мавсумда ҳали кураги ерга тегмаган, мағлубият нималигини билмай келаётган биргина клуб қолган ва бу ҳам бўлса “Нефтчи”. Ҳа, бу борада жамоа бош мураббийи Виталий Левченкога қойил қолса арзийди. Шунинг учун ҳам яқинда у билан шартнома узайтирилди, бу бежиз эмасди.

“Сўғдиёна” учун “Истиқлол” стадиони қулайроқ дейиш мумкин. Чунки биринчи даврада “Андижон” ўз ўйинларини вақтинча “Истиқлол” стадионида ўтказаётганида жиззахликлар айнан у ерда андижонликларни 1:2 ҳисобида мағлубиятга учратиб қайтганди. Бу ҳали ҳаммаси эмас. Қуйироқда яна тўхталамиз.

Унгача статистик рақамларга кўз ташлаймиз. “Нефтчи” – “Сўғдиёна” қарама-қаршилиги доирасида клублар шу пайтгача чемпионатда 51 бор тўқнаш келишган. Мезбонларда 29, меҳмонларда 11 та ғалаба бор. Яна 11 та учрашувда кучлар тенг келган. Тўплар нисбати 95\42 “Нефтчи” фойдасига.

Биринчи даврада “Нефтчи” сафарда “Сўғдиёна”ни 2:0 ҳисобида енгиб қайтгани ёдингизда бўлса керак. Лекин фарғоналиклар учун “Сўғдиёна”га қарши охирги йиллардаги ўйинлар статистикаси салбий бўлиб турибди. Чунки “Нефтчи” ўз майдонида “Сўғдиёна” сўнгги марта 2015 йили мағлуб этган. Ўша йилнинг 24 апрелида фарғоналиклар 4:1 ҳисобида тор-мор келтирган. Шундан бери “Нефтчи” ўз уйида “Сўғдиёна”ни мағлуб этиш йўлини топа олмаяпти. Ҳаммаси бўлиб Жиззах жамоаси сафарда 5 ғалаба ва 3 дуранг қайд этган. Масалан, “Нефтчи”га қарши Фарғонадаги охирги 3 та ўйиндан бери фақат ғалаба қозониб келаётгани эътиборга молик.

Кўриниб турибдики, “Сўғдиёна” “Нефтчи” учун Фарғонада ноқулай рақибга айланиб қолган. Бошкович бу йилги чемпионатда “Нефтчи”нинг илк бор мағлуб бўлиши учун ўзига хос режа ишлаб чиқиши табиий. Кўрамиз, Левченко жамоаси мағлубиятсиз сериясини давом эттира оладими ёки “Сўғдиёна” тўхтатадими?

Шуҳратбек Жўраев.