"Бозорда юқори сифатли ўйинчилар бор, лекин..." ёхуд "Нефтчи" устози таркибда яна қандай ўзгаришлар бўлиши, Лутфулла Тўраев масаласи ва Аброр Исмоиловнинг кетишига қандай муносабат билдирди?

Фарғонанинг “Нефтчи” клуби куни кеча Тошкентдаги йиғинини якунлади. Айтиш керакки, бу уларнинг янги мавсум учун кўраётган тайёргарлик жараёнининг биринчи босқичи ҳисобланади.

Таркибда ҳам аллақачон ўзгаришлар бошланиб кетган. Клуб устози Виталий Левченко жамоасининг илк ўқув-машғулот йиғинидан сўнг Sports.uz журналисти Шуҳратбек Жўраевнинг саволларига жавоб қайтарди.

- Виталий Григорьевич, жамоангизнинг Тошкентда ўтказилган биринчи йиғинидан қониқдингизми?

- Ҳа, биз самарали ишларни олиб бордик. Режамизга кўра иккита назорат ўйинини ўтказдик. Ўйинчиларимизни жиддий вазифага тайёрлаб боряпмиз.

- Аброр Исмоиловнинг кетиши катта йўқотишми? Уни “Нефтчи”да олиб қолишнинг иложиси бўлмадими?

- Асосий таркиб футболчиси кетганида бу доим йўқотиш бўлади. Шу сабаб биз албатта таркибни кучайтириш устида иш олиб боряпмиз.

- Умуман айтганда, унинг “Навбаҳор” клубига ўтиши сиз учун кутилмаган янгилик бўлдими ёки...

- Миш-мишлар чемпионат тугашидан иккита тур олдин ҳам бор эди. Ўшанда Исмоиловга “Навбаҳор” қизиқаётганидан хабаримдор эдим. Албатта, футболчи фаолиятини қаерда давом эттириш борасидаги қарорни ўзи қабул қилади. Ҳа, Аброр билан гаплашдим. Футболчи менга Осиё Чемпионлар лигасида ўйнашини хоҳлашини айтди.

- Шу кунгача яна қайси футболчилар билан шартномалар имзоланди?

- Нурилло Тўхтасинов ва Тома Табатадзе билан шартномалар имзоладик. Улар яхши даражадаги футболчилар. Шу боис иккаласи ҳам бизга ёрдам бера олишади, деб ҳисоблайман.

- Энди жамоангиз Туркияда шуғулланади. Қайси рақиблар билан ўйнайсизлар?

- Ҳа, биз Туркияда иккита йиғин режалаштирганмиз. Ҳаммаси бўлиб 10 та назорат учрашувини ўтказиш кўзда тутилган. Иккита йиғинимиз доирасидаги 10 та учрашув учун шартномалар имзоланиб бўлди. Бу Польша ва Украина премьер-лигаси жамоаларидир.

- Айни пайтда сизни қийнаётган муаммо нимада?

- Асосий муаммо бу жамоани юқори даражали ўйинчилар билан кучайтириш. Биз бу борада сифатни хоҳлаймиз.

- Селекция ишларидан қониқяпсизми? Яна кимлар билан шартнома имзоланади?

- Таркибни кучайтириш устида кунига 24 соатдан ишлаяпмиз. Ишонинг, бу оддий жараён эмас. Биз жуда кўп футболчиларни кўриб чиқдик. Ҳаммаси ҳам қарашларимиз ҳамда талабларимизга жавоб беравермайди. Бозорда юқори сифатли ўйинчилар бор. Лекин уларнинг талаби ҳам анча жиддий. Биз ўзимизнинг бюджетимиздан келиб чиққан ҳолда иш олиб борамиз.

- “Нефтчи” йиғинида бўлган легионерлар – Лисакович билан Батюшин кабиларнинг тақдири нима бўлади? Улар ёқдими?

- Албатта, ушбу ўйинчиларни ҳам кўриб чиқдик. Улар борасида Туркиядаги йиғинимизга яқин қарор қабул қиламиз. Чунки бизда легионерлар лимити бўйича жойларимиз чекланган.

- Негадир Лутфулла Тўраевни йиғинларда кўрмадик...

- Лутфулла Тўраев асосий жамоамиз билан ишлаётганди. Унга сунъий майдонда ўйнаш таъқиқланган. Шу сабабли уни эҳтиёт қилдик.

- Сир бўлмаса яна янги легионерлар қўшиладими?

- Легионерлар бўлади. Лекин биз ҳар томонлама ўзимиз учун қулай бўлишини хоҳлаймиз. Нархи, сифати ва ўйин услубимизга мос келиши керак.

Шуҳратбек Жўраев.