Бу ақлга сиғмайдиган нарса! Ҳусановнинг собиқ клубига Англиядан ғалати таклиф келди

Франциянинг вице-чемпиони «Ланс» клуби президенти Жозеф Угурлян унинг жамоасига Англия клубларидан бири фарм-клуб бўлиш таклифини билдирганини маълум қилди.

Инглизларнинг бу талаби, клуб раҳбарининг ғазабини келтирди. Унга кўра, бу вариант мутлақо қабул қилиб бўлмайдиган йўл ҳисобланади.

- Бу мутлақо ақлга сиғмайдиган нарса! Ҳа, бизга бундай таклиф бўлган, лекин мен ҳеч қачон бундай йўлни кўриб ҳам чиқмайман. Бу клубнинг ДНКсига зид. 

Қачонгача кучимиз етишидан қатъи назар, биз бундай нарсага розилик бермаймиз. Балки менда ақлий жиҳатдан нимадир етишмас, лекин шахсан мен бу лигамиз учун жуда қайғули ҳолат, деб ўйлайман.

Биз – Франциямиз, жаҳон чемпионати ярим финалига чиққан мамлакатмиз, дунёда энг кўп футболчи тайёрлайдиган юртмиз. 

Биз АПЛ учун «Б лига»га айланиш эмас, ундан ҳам юқори мақсадларга интилишимиз керак!,  — дея Жозеф Угурляннинг сўзларини L'Equipe нашри келтирди.

Эслатиб ўтамиз, 2025/2026 йилги мавсумда «Ланс» Франция кубогини қўлга киритди ва Лига 1 чемпионатида 2-ўринни эгаллади.

Таъкидлаш жоизки, Франция клублари Европанинг топ-лигаларидаги клублар учун истеъдодларни тарбиялаб берадиган ўзига хос фабрикага айланиб улгурган. 

Хусусан, бугунги кунда жаҳон футболида энг зўр ҳимоячилардан бири сифатида эътироф этилаётган Ўзбекистон миллий терма жамоаси ҳимоячиси Абдуқодир Ҳусанов ҳам айнан Лига 1 тўқнашувларида етилган чарм тўп усталаридан ҳисобланади.

«Ланс» клуби Адуқодирни 2023 йилнинг ёзида Беларуснинг «Энергетик-БГУ» клубидан трансфер қилди. Ҳусанов айнан мана шу жамоа сафида «кўҳна қитъа»нинг топ-лигаси даражасида дебют қилди, Европа чемпионлар лигасида ўйнади, ҳақиқий Европа футболидан баҳраманд бўлди. 

Лансликлар сафида бир ярим йил ўйнаб, ўз салоҳиятини намойиш қилган ўзбек футболчисини 2025 йилнинг 20 январида  «Манчестер Сити» 50 миллион евро эвазига ўз сафига қўшиб олди.