Бу гаплардан кейин "Барса" Ферран Торресни сотиб юборадиган бўлди

«Барселона» ҳужумчиси Ферран Торреснинг сўнгги баёнотлари унинг жамоани тарк этиши эҳтимолини кучайтирди.

26 ёшли футболчи «ПСЖ» томонидан қизиқиш билдирилишини «яхши ишора» деб баҳолади ва шу билан бирга «Барселона» раҳбариятига уни сақлаб қолиш учун тезроқ ва қатъийроқ ҳаракат қилиш кераклигини англатди. Mundo Deportivo нашри ёзишича, каталонияликлар бу сўзларни футболчининг жамоадан кетиш истаги сифатида қабул қилган. Энди клуб раҳбарияти расмий таклифларни кутаётгани айтилмоқда.

Ферран Торрес учун асосий даъвогар сифатида «ПСЖ» тилга олинмоқда. «Барса» раҳбарияти парижликлар жаҳон чемпионати финалида ҳал қилувчи гол муаллифи бўлган ҳужумчи учун жиддий миқдорда тўлов таклиф қилишини кутмоқда. 

Ферраннинг амалдаги шартномаси келаси йили якунланади, аммо каталонияликлар уни арзон нархга қўйиб юбориш ниятида эмас.