Бу ҳам рекорд: Муҳаммад Салоҳ ҳеч ким уддаламаган натижага эришди

“Ливерпуль” қанот ҳужумчиси Муҳаммад Салоҳ Англия профессионал футболчилар ассоциацияси (PFA) томонидан йилнинг энг яхши ўйинчиси, деб топилди.   

Мисрлик тўпурар бу совринни учинчи бор қўлга киритди ва бу борада янги рекорд ўрнатди. Англия Премьер-лигаси тарихида профессионал ўйинчилар ҳеч қачон бирор ҳамкасбларини уч марта бу совринга лойиқ кўрмаган.

“Ливерпуль”нинг чемпионлиги билан якунланган ўтган мавсумда Муҳаммад Салоҳ лига доирасида 38 та учрашувда қатнашиб, 29 та гол ва 18 ассист муаллифи бўлди.

33 ёшли футболчи тўпурарлар пойгасида биринчи ўринни олишдан ташқари, чемпионатда энг зўр ассистент ҳам бўлди.

2017 йилдан бери “Ливерпуль” шарафини ҳимоя қилиб келаётган африкалик ҳужумчининг клуб билан шартномаси 2027 йилнинг ёзигача тузилган.