Бу каби ўйинлар оддий тарзда ўтмайди, рақибини яраланган шер каби кутиб олади ёхуд Суперлигамизнинг 9-турида унутилмас ўйинлар бор

Суперлиганинг 8-тури ёзга қолдирилгани туфайли жамоалар 7-турдан 9-турга сакрашмоқда.

4-8 май кунлари 7 та жуфтлик Суперлига доирасида айнан 9-тур учрашувларини ўтказадилар.

Олдимизда турган ўйинлар эса сизни асло бефарқ қолдирмайди.

4 май

“Бухоро” – “Металлург”

“Металлург” ўтган турда “Андижон”дан 5:0 ҳисобидаги қақшатгич тарзда қабул қилиб олган мағлубиятидан ўзига кела олдими? Олдинда эса Веско Стешевич жамоасини сафарда “Бухоро”га қарши учрашув кутиб турибди. Аксига олиб, Улуғбек Бақоев бухороликлар устозига айлангач, Суперлигада ҳали ғалаба қозонишгани йўқ. Жамоа унинг бошчилигида ҳозирча 2 мағлубият ва 1 дуранг ўйнади. Чемпионатда шу кунгача ўз дарвозасидан энг кўп гол ўтказиб юборган жамоа “Металлург” бўлиб турибди. 7 та учрашувда 16 марта гол ўтказган. Агар мураббийлар клубнинг мудофаа чизиғини мустаҳкамламаса “Бухоро”да очко йўқотиши мумкин.

5 май

“Андижон” – “Сўғдиёна”

Фарғонадаги “Истиқлол” стадионидан номинал мезбон сифатида фойдаланиб турган андижонликлар бу сафар “Сўғдиёна”ни қабул қилади. 7-турда “Металлург”ни қабул қилиб жавобсиз 5 та гол урган “Андижон” навбатдаги учрашувда ҳам яна голлар шоусини ташкил қила оладими? Агар “Бургутлар”нинг охирги ўйинидан хулоса қиладиган бўлсак, меҳмонларга анча қийин бўлади. “Сўғдиёна” янги бош мураббий Иван Бошковичнинг услубига мослашиш жараёнида.

6 май

“Бунёдкор” – “Олимпик”

Мазкур учрашувни стадионида бевосита ФИФА президенти Жанни Инфантинонинг шахсан ўзи кузатиши кутилмоқда. Асосан ёшларга таянадиган икки жамоа ўртасидаги ўйин шу куни бошқача тус олса керак. Ўтган турда иккала жамоа ҳам ютқазди. Албатта, баҳс олдидан имкониятлар тенг. Лекин бу жуда қизиқарли ўйин бўлиши катта эҳтимол.

“Турон” – “Пахтакор”

Чемпионатимизда биргина ғалаба қозонмаган жамоа қолди, бу ҳам бўлса про лигадан қайтган “Турон”, шунинг учун раҳбарият яна мураббийни ўзгартирди. Бу сафар россиялик Денис Бушуев таклиф қилинди. У дебют учрашувида “Навбаҳор”га имкониятни бой берилди. Энди “Пахтакор”ни қабул қилади. Гарчи Максим Шацких жамоаси билан чемпионатни иккита кутилмаган мағлубият билан бошлаган бўлса-да, шундан бери фақат ғалаба қозониб келмоқдалар. Рости, “Турон” ва Бушуевга тақвим ноқулай. Чунки бирин-кетин жиддий рақибларга қарши ўйнамоқда. Бўлажак учрашувда ҳам “Шерлар”нинг имконияти юқорироқ.

7 май

“Насаф” – “Навбаҳор”

Ҳақиқий жанг бўлади. Бу шубҳасиз турнинг марказий учрашувига айланади. Катта ўйин ва шунга яраша аудиторияни ўзига жалб қилишга қодир бўлган қарама-қаршилик. Эсимизда, ўтган йили “Навбаҳор” Самвел Бабаян бошқарувида “Насаф” майдонида шундай ўйин кўрсатгандики, мезбонларга ҳеч қандай имконият қолдирмасдан ягона гол эвазига ютиб кетганди. Иккаласининг мақсади соврин ютиш. Бундай тўқнашувда ҳар икки клубда босим бўлади. Барибир ким энг зўр тайёргарлик кўргани якунда ўз сўзини айтади. Бу каби учрашувлар оддий тарзда ўтмайди.

“Сурхон” – “Нефтчи”

Бу жуфтлик ҳам қизиқарли ўтади. Чемпионатни кутилганидан анча яхши бошлаган “Сурхон” пешқадамлардан бири, ҳали мағлубият нималагини билмай келаётган “Нефтчи”ни қабул қилади. Термизликлар бу йил анча қайсар жамоа сифатида кўзга ташланмоқда. Ҳозирда “Нефтчи” бош мураббийи Виталий Левченко мазкур ўйинга шогирдларини ҳар жиҳатдан пухта тайёрлашга ҳаракат қилаётгани аниқ. Чунки “Сурхон” жиддий рақиб сифатида гавдаланмоқда ва буни фарғоналиклар устози яхши тушуниб турибди.

8 май

ОКМК – “Қизилқум”

Миржалол Қосимов жамоасида устунлик катта, буни тан олиш керак. “Қизилқум” ўйинида ҳали тузатадиган жиҳатлари кўп. Қолаверса, навоийликлар бош мураббийи Асрор Алиқулов ҳам бир неча бор шу ҳақида гапирган. Боз устига олмалиқликлар сўнгги иккита турда мағлубиятга учраганини ҳисобга олсак, “Қизилқум”ни яраланган шер каби кутиб олади.

Шуҳратбек Жўраев.