Bu masala o‘tgan yili ham rosa avj olgandi yoxud Superligada hammani qiziqtirayotgan mavzu

Kecha PFLda yig‘ilish o‘tkazildi. Unda Superliga va pro liga (yuqori beshtalik) klublari bosh murabbiylari ishtirok etdi. Asosiy masala sifatida keyingi yil uchun rejalar muhokama qilingan. Taassufki, yig‘ilish silliq kechmagan. “Dinamo” bosh murabbiyi Vadim Abramov O‘zPFL bosh direktori Diyor Imomxo‘jaev bilan “aytishib” qolgan. O‘zi shundoq ham ularning munosabati oldindan ko‘ngildagidek emasdi, bizningcha. Kechagi yig‘ilishda Vadim Karlenovich “aytishuv”dan keyin zaldan barvaqt chiqib ketgan.

Odatda, bizda har mavsum yakuniga yaqin kelasi yil uchun Superligada jamoalar sonini 16 taga oshirish muhokama mavzusiga aylanib qoladi. Yig‘ilishda ham shu narsa ko‘tarilgan. Tabiiyki, Diyor Imomxo‘jaev o‘z pozitsiyasida qat’iy turgan. Hozir Reglamentga o‘zgartirish kiritish ko‘rib chiqilmayapti. Rosti, Superligada klublar soni 16 taga oshirish masalasi kimdir tomonidan ko‘tarilmasa men hayron qolardim va bu narsa yana bo‘y ko‘rsatishni boshladi. Tabiiyki, bu “Dinamo” va yana ligada qolish uchun kurashayotgan jamoalar uchun ayni muddao bo‘ladi. Lekin hammasi hech bir o‘zgarishsiz qolyapti. PFL Reglamentga amal qilyapti, klublar sonini o‘zgarishsiz qoldirib kelyapti.

Chempionatimizda turli yillar davomida klublar soni turlichani tashkil qilgan. 2019 yildan beri Superliga 14 ta jamoa ishtirokida o‘tkazib kelinyapti. Ayrim murabbiylar klublar sonini 16 taga oshirish tashabbusi bilan chiqishyapti. Yodingizda bo‘lsa, o‘tgan yili ham shu masala rosa avj olgandi. Hatto, ishtirokchilar soni 16 taga oshirilishiga ishonganlar ham bo‘lgan. Baribir hammasi 14 taligicha qoldirilgan. Diyor Imomxo‘jaevning bu masaladagi qarashlari hammaga ma’lum.

Superligada 16 ta klub qatnashadigan bo‘lsa, o‘z-o‘zidan o‘yinlar soni ham oshadi. Lekin tanganing orqa tomoniga ham qarab qo‘yish kerak. Elitada 16 ta ishtirokchi qilinsa, bu pro ligaga jiddiy zarba bo‘ladi. Oxirgi ikki yilda pro ligadagi intriga sezilarli darajada oshirilgani, ayni haqiqat. Chunki Superliga uchun kurashadiganlar soni oshdi va o‘yinlar shiddati ham kuchayib ketdi. U erdan ikkita klub qo‘shib qo‘yilsa, intriga “sinadi”. Qolaversa, moliyaviy imkoniyatlar ham asosiy o‘ringa chiqishini unutmaslik kerak. Pro ligadagi jamoalarda ham o‘ziga yarasha qiyinchiliklar bor. O‘zi, endi u erdagi saviya oshirilishiga erishildi.

Superligada pastki o‘rinlardagi jamoalar kelasi yilga 16 ta bo‘lishini o‘ylamasdan, avvalo o‘zlari o‘rnini saqlab qolish uchun kurashishlari maqsadga muvofiq, aslida. Bizda esa doim shunaqa: pro liga manzili ko‘rinib qolgan mahalda darrov jamoalar sonini oshirish kerakligi haqida aytishni boshlaydilar. Ha, bu masalada har kim o‘z fikrini bildirishga haqli. Ammo unga amal qilish boshqa masala. Hali chempionat tugashiga 7 ta tur bor. Lekin murabbiylar 16 ta jamoa haqida o‘ylashni boshlashdi, nazarimda.

Darvoqe, bizga etib kelgan ma’lumotga qaraganda, kelasi yili chempionat 25 fevral sanasidan start oladi. Har qachongidan ertaroq boshlanadigan bo‘lsa, klublarning tayyorgarligi ham shunga qarab bo‘ladi. Bundan tashqari, kelasi yili “O‘zPFL” Kubogi musobaqasi qayta tiklanishi ham kutilmoqda. Xullas, yangi mavsum rejalari bisyor. Uning “qaynoq” muhokamasi esa hozirdan boshlanib ketdi. Bu borada siz qanday fikrdasiz?