Бу мавсум Италияда қайси жамоа чемпион бўлади? "Олтин тўп" соҳиби жавоб берди

"Ювентус" клуби ва Италия терма жамоасининг собиқ ҳимоячиси Фабио Каннаваро А Сериянинг жорий мавсумидаги чемпионлик пойгаси ҳақида гапирди. Италиялик мутахассис "Наполи" раҳбарияти унга жамоа мураббийи лавозимини таклиф қилганми ёки йўқлигини ҳам айтиб ўтди.

“Скудеттони ким ютади? Ҳозирда "Интер" А Сериянинг барча бошқа жамоаларидан кучлироқ. Милан жамоасининг ўйини мустаҳкам кўринмоқда. Ваҳоланки, “Ювентус”да Италиянинг энг яхши футболчиси – Федерико Кьеза бор.

"Наполи" менга иш таклиф қилдими? Мен бу жамоани бошқаришга қарши эмасман, лекин улар менга қўнғироқ қилишмади”, - деди Каннаваро Tuttosport нашрига берган интервьюсида.

Айни дамда “Интер” Италия чемпионати турнир жадвалида биринчи ўринни эгаллаб турибди. “Нерадзуррилар” 19 турдан кейин 48 очкога эга ва “Ювентус”дан 2 очко олдинда. Амалдаги чемпион "Наполи" эса 9-ўринда бормоқда.