Бу ўйинда дуранг бўлиши мумкин эмас! "Локомотив" плей-оффга қолганидан хурсанд, "Турон"-чи?

Қатарда жаҳон чемпионати давом этаётгани сабабли барчамизнинг нигоҳимиз ушбу мундиалга қаратилган. Айниқса, кунига тўрттадан ўйинни кўришнинг ўзи ҳам осон иш эмас экан-а? Лекин буни қадрига етиш керак, ахир жаҳон чемпионати ҳар тўрт йилда бир ўтади, доим ҳам эмас. Майли, асосий мавзудан узоқлашмайлик, бу биз бугун сўз юритадиган асосий масала эмас. Айтмоқчимизки, ҳамма Қатар майдонларидаги ўйинлар шоҳиди бўлаётган бир пайтда ўзимизда ҳам бир муҳим ўйин борлигини эслатиб ўтмоқчимиз.

Гап шундаки, 25 ноябрь куни Яйпандаги “Ўзбекистон” стадионида “Мавсум-2023”да Суперлигада иштирок этиш учун плей-офф учрашуви ўтказилади. Унда бу мавсумда про лигада 3-ўринни эгаллаган “Турон” билан Суперлигада 12-поғонани банд қилган “Локомотив” клублари ҳал қилувчи баҳсда куч синашишади. Фақат битта ўйиндан иборат бўлган учрашувда ғолиб жамоа келаси йили Суперлигада ўйнайди.

Мазкур қарама-қаршилик иккала жамоа учун қанчалик муҳимлигини учрашувга алоқаси борлар жуда яхши ҳис қилиб туришибди. Бу клублар ўтган мавсумда Суперлигада икки бор тўқнаш келишган.

2021 йил. Суперлига. 1-давра. 3-тур

“Турон” – “Локомотив” – 2:2

Голлар: Деня Поньевич. 4 – 1:0. Владислав Касминин, 11 – 2:0. Жавоҳир Сидиқов, 16 – 2:1. Темурхўжа Абдуҳолиқов, 69-пен. – 2:2.

2-давра. 16-тур

“Локомотив” – “Турон” – 3:1

Голлар: Билолхон Тошмирзаев, 30 – 0:1. Темурхўжа Абдуҳолиқов, 42-пен. – 1:1. Темурхўжа Абдуҳолиқов, 71  - 2:1. Азизбек Амонов, 77 – 3:1.

Ўзбекистон Кубоги. 2-тур

“Локомотив” – “Турон” – 2:0

Голлар: Марат Бикмаев, 58 – 1:0. Азизбек Амонов, 90+3 – 2:0.

Ўтган йили мазкур клублар 3 марта тўқнаш келишди. Гувоҳи бўлганингиздек, устунлик “Локо” тарафида. 2 тасида “темирйўлчилар”нинг қўли баланд келган ва 1 та учрашувда дуранг қайд этилган. “Локомотив” 3 та баҳсда 7 та гол урган ва дарвозасидан 3 та тўп олиб чиққан. Гол урган футболчиларнинг бирортаси ҳозир ушбу клубларда эмас.

Навбатдаги учрашув энди олдингиларидан фарқ қилади. Чемпионат ва Кубок баҳсларида тўқнаш келишганди, энди улар плей-оффда! Бу вазиятга етиб келиш иккала жамоа учун аслида яхши натижа эмас. Айниқса, “Турон” про лигада оғзидаги ошни олдирди. Чунки кўпчлик тўғридан-тўғри Суперлигага қайтишини кутганди. Аммо чемпионат охирларига яқин кетма-кет очколарни йўқотиб, ўзидан анча орқада бўлган “Бухоро”ни олдинга ўтказиб юборди. Натижада “Турон” 3-ўрин билан плей-оффга қолиб кетди. Энди Бахтиёр Ашурматов жамоасининг бор умиди плей-оффдан. Улар “Локомотив”га қарши ғалаба учун борини бериши аниқ. Лекин олдиндан аниқ айтамизки, осон бўлмайди.

“Локомотив”нинг вазияти бироз бошқачароқ бўлди. Чемпионатни бир текисда ўтказа олмаган ва “Турон”га ўхшаб мураббийлар алмашинуви амалга оширилган клубни про лигага тушиб кетиши жуда катта эҳтимол бўлиб турган бир вазиятда Суперлиганинг охирги турида “Металлург”ни мағлуб этиши ва бунинг акси ўлароқ асосий рақобатчиси – “Қўқон-1912”нинг Самарқандда мағлубиятга учраши эвазига “Локо”нинг ўрнига қўқонликлар про лигага кетди ҳамда “темирйўлчилар” плей-оффга илашиб қолганидан хурсанд бўлишди. “Турон”ни ютиш орқали Суперлигадаги ўрнини сақлаб қолишни кўзлашяпти. Аммо Ашурматов жамоасини ўз уйида мағлуб этиш “Локомотив”га насиб қиладими? Билганимиз шуки, ушбу учрашувда мутлақо дуранг натижа бўлиши мумкин эмас! Кимдир ютиши аниқ. Бу жорий йилги мавсумнинг сўнгги расмий ўйини. Шунинг учун 25 ноябрь куни соат 15:00 да бўладиган ўйин қизиқарли ўтишини тахмин қилиш қийин эмас.

Шуҳратбек Жўраев.