"Бу про лига учун ажойиб топилма" - "Янгиер" устози Диёр Мирзабоев чемпионлар лигасида ўйнаган ўйинчининг келиши ва кучлироқ легионерларни кутаётгани ҳақида

Кеча “Бунёдкор” академияси майдонида “Машъал” ҳамда “Янгиер” иштирокидаги ўртоқлик учрашувини кузатиб бордик. Ўйин натиждаси ҳамда таркибдаги ўзгаришлар бўйича сайтимиз орқали хабар бердик. Баҳс якунида “Янгиер” бош мураббийи Диёр Мирзабоев билан тайёргарлик жараёни ва янги футболчилар хусусида суҳбатлашдик.

- Жамоангизнинг “Машъал”га қарши ўйини сизда қандай таассурот қолдирди?

- Чемпионат яқин, 6 августда расмий ўйинимиз бор. Яна бир бор Польшадан келган легионерларни ва ўзимиздан қўшилган янги футболчиларни асосий таркибда майдонга тушириб, кўриб олишим керак эди. Тайёргарлигимиз режа асосида кетяпти. 5 та ўртоқлик учрашувини ташкиллаштирганмиз. Асосийси, назорат ўйинларида ғалабага эришиш эмас, жамоавий ўйинни шакллантиришга, ўйин амалиётини оширишга қаратганмиз. Чунки бизга янги йигитлар қўшилганди.

- Умуман олганда, “Янгиер”нинг ёзги йиғини бош мураббий сифатида ўзингиз ўйлаган режа асосида давом этяптими ёки...

- Ҳаммаси режа асосида бўлди. Тайёргарликка етарлича вақт берилди – 35 кун. Фақат битта камчилик - биринчи даврадан кейин футболчи олиш қийин. Бир қатор ўйинчилар тайёргарликнинг иккинчи босқичи тугаётганида қўшилишди. Яна 2-3 таси учинчи босқичда қўшилишади. Чунки бизга керакли футболчиларни қўлга киритиш осон бўлмаяпти, аксариятини клублари билан шартномалари бор. Барибир тайёргарликдан кўнглим тўқ, ҳаммаси режа асосида ўтяпти. Раҳбариятга ҳамма шароитни яратиб бераётгани учун раҳмат.

- Польшалик легионерларнинг тақдири нима бўлди? Улар қолишадими?

- Аслида уларни ўзимиз олиб келмаганмиз, бизга тавсия қилишган. Легионерлар бизни ўйинчилардан бир бош кучли бўлиши керак-да. Уларни олиб келиб, аммо ўйнатмасам раҳбарият ва мухлислар олдида ноқулай ҳолатда қолиш мумкин. Ҳозирча ўзимизнинг йигитлардан устун томони кўринмаяпти. Ҳали уларнинг масаласи очиқ турибди.

- Таркибда Осиё Чемпионлар лигасида ўйнаган Муҳаммад Исаевни кўрдик, очиғи, буни кутмагандик...

- Исаевни қандай ижрочилигини ҳамма билади. Про лига учун бу яхши танлов. Бу футболчи хориж клублари билан музокара ўтказаётганди. Уни менга бир танишим айтиб қолди, ҳозир бўш, ҳали кетгани йўқ, деди. Ҳозиргача Муҳаммад Исаевнинг масаласи 50х50. Биз у билан музокара олиб боряпмиз. Бу про лига учун ажойиб топилма. Биласиз, асосий мақсадимиз 5 та турдан кейин кучли бешталикка кириш. Имкон қадар таркибни кучайтиришга ҳаракат қиляпмиз. Исаевнинг масаласи бугун-эрта ҳал бўлади.

- “Янгиер”ни бир қатор ўйинчилар тарк этди. Асосий таркиб аъзоларини нега сақлаб қола олмадинглар?

- Жамоамизни ёшартирмоқчи бўлдик. Ким билан шартнома тузаётган бўлсак, унинг муддати камида 1,5 йилни ўз ичига оляпти. Биз бу йилни ҳам, келажакни ҳам ўйлаган тақдирда шундай қиляпмиз. Клуб сиёсати бўйича ёшлар билан узоқ муддатли шартномалар тузишни ният қилганмиз. Шунинг учун бошқалар билан дўстона хайрлашдик.

- Таркибга яна қайси янги футболчилар қўшилади?

- “Машъал”дан Жонибек Мирзақуловни олдик. Эркин агент сифатида келди. Биз билан шартномага қўл қўйди. Яна “Машъал” билан келишган ҳолатда Абдураҳмон Абдулҳақовни ҳам сафимизга қўшиб олдик. Биринчи даврада Абдулҳақов “Машъал”нинг асосий ўйинчиларидан бири эди. Эътибор берган бўлсангиз, футболчиларни “Янгиер” жамоасидан юқори ўриндаги клублардан оляпмиз. “Нефтчи”дан марказий ҳимоячи Шодиёр Хожиматовни таклиф қилдик. Тўғри, у ерда ўйин амалиётисиз қолиб кетган. Илҳом Мўминжонов футболчини майдонга туширмасдан 20 талик рўйхатда ушлаб ўтирган. Шу кунларда янги легионерлар кутяпмиз. Рости, бизга легионерлар керак. Кўряпсиз, ўзимиз яратган вазиятлардан унумли фойдалана олмаяпмиз. Олдимизда турган 5 та учрашувда бешталикка кириш учун имкониятимиз бор. Бизга шундай легионер керакки, ўзини имкониятидан албатта гол уриши керак. Албатта, даражаси юқори легионернинг молиявий имконияти ҳам шунга яраша каттароқ бўлади. Аммо раҳбаримиз Маҳмуд Орзиқулович имконият яратиб беришини айтди. Ўзимизда гол урадиган ҳужумчилар кам-ку. Ҳужумчи кўп, аммо гол урадигани кам.

- Янги легионерлар қаердан келяпти?

- Иккита вариантимиз бор. Бири сербиялик, ҳозирда Черногория чемпионатида ўйнайди. Яна бири Руминия Суперлигасида тўп суради. Иложи бўлса, иккаласидан фойдаланишимиз мумкин. Музокаралар давом этяпти. Руминия чемпионатидаги ўйинчи асли нигериялик. Икки кун вақт қолди, улгурсак олиб келамиз. Улар тайёр шартномага келишади. Юқори даражали футболчилар бўлгани сабабли уларни кўрикка олиб келиб бўлмайди.