Бугун "Тоттенхэм" "Манчестер Сити"ни меҳмон қилади ёхуд Пеп Моуриньонинг юбилейига нималар ҳозирламоқда? (превью)

Терма жамоа йиғинлари туфайли клублар футболи бироз танаффус олишига тўғри келди. ФИФА кунлари доирасида ўз миллий терма жамоасига жалб қилинган футболчилар бугун яна ўзлари ҳаракат қилаётган клублар сафида жавлон уришга тайёр. Жумладан, бугун Премьер-лига 9-турининг марказий учрашувида қатнашадиган "Тоттенхэм" ва "Манчестер Сити" футболчилари ҳам. Бироқ уларнинг баъзилари жароҳат туфайли ўз жамоаларига ёрдам беролмаслиги ҳам бор гап. Қуйида уларга тўлиқроқ тўхталишни ваъда қилган ҳолда, бир маълумотга эътиборингизни қаратишни лозим деб билдик: кеча "шпорлар" устози Жозе Моуриньо клуб постини қабул қилиб олганига роппа-роса 1 йил тўлди. Демак, португалиялик мутахассисда кайфият байрамона ва буни Жозенинг принципиал рақиби Пеп Гвардиола шундай қолдиришига ишониш қийин. Боз устига, Пеп яқиндагина "шаҳарликлар" билан янги шартнома имзолади ва ушбу ўйинда қозониладиган ғалаба араб миллиардерлари ишончини оқлаш учун қўйилган навбатдаги қадам бўлиши шубҳасиз.

"Тоттенхэм"

Айни пайтдаги "шпорлар"ни "Сити"дан кучсиз, деб ким айта олади? Турнир жадвалида 2-ўринда жойлашган лондонликлар ажойиб сермаҳсуллик намойиш этмоқда. Улар 8 турда 19 та гол уриб, бу борада фақатгина "Челси"дан ортда боряпти. Ҳимоявий ўйин тарафдори сифатида ёдимизда қолган Моуриньо ўз услубини ўзгартираётганлиги қувонарли ҳолат. Харри Кейн ва Сон ўзининг кучли ўйинларини кўрсатмоқда. Ҳимоя кўрсаткичлари ҳам ёмон эмас: "Тоттенхэм" энг кам гол ўтказган 4 клубдан бири. Фақатгина, бугун жамоасига ёрдам бера олмайдиган Мэтт Доэрти Моуриньони ўйлантириш мумкин. Жамоада бошқа муаммо йўқ. Муҳими, жамоада тартиб бор ва бу натижаларда ҳам ўз аксини топмоқда. "Шпорлар" АПЛдаги энг узоқ давом этаётган мағлубиятсиз серияни қайд этяпти: 5 ғалаба ва 2 дуранг. Ўзаро ўйинларда ҳам лондонликлар олдинда эканлигига нима дейсиз?! Ўтказилган 46 ўйиннинг 24 тасида "Тоттенхэм" зафар қучган. "Шаҳарликлар" 15 баҳсни ўз фойдасига ҳал этган бўлса, 7 учрашувда жамоалар муроса кўчасини танлаган.

Тахминий таркиб: Льорис, Орье, Алдервейрелд, Дайр, Регилон, Хёйберг, Уинкс, Сиссоко, Бэйл, Сон, Кейн.

Жозе Моуриньо: "Агар бир йил ортга қайтганимда ҳам ушбу клуб билан ҳеч иккиланмай шартнома имзолаган бўлардим. Бизда ажйоиб таркиб бор. Ушбу йигитлар билан кўп нарсага қодирмиз. Премьер-лигадаги натижаларимиз менга ёқяпти. Лекин бундан кўпроғига қодирмиз".

"Манчестер Сити"

Бу мавсум "Манчестер Сити" АПЛнинг энг тушунарсиз жамоасига айланиб бормоқда. Сермаҳсуллик борасида аксарият клубларга мастер-класс ўтай оладиган "шаҳарликлар" ортда қолган учрашувларда ўзига ўхшамаяпти. Бунга қайсидир маънода икки марказий ҳужумчининг жароҳат олганини ҳам сабаб қилиб кўрсатиш мумкин. Бироқ Гвардиола шогирдларининг Чемпионлар Лигасидаги натижаларига нима дейсиз?! 3 ўйинда 9 та гол урган "Сити" АПЛдан кўра еврокубокка кўпроқ эътибор қаратаётгандек кўринмоқда. Бу тахминнинг нотўғрилигини исботлаш бугун манчестерликлар ғалаба қозониши ва жамоа эгалари яратиб бераётган имкониятларга муносиб жавоб қайтариши мумкин. Жароҳат олган Стерлинг, Аке каби футболчиларни ҳисобга олмасак, Гвардиола қўлидаги "карталар" жуда катта қийматга эга.

"Манчестер Сити": Эдерсон, Уокер, Диаш, Ляпорт, Канселу, Родри, Гюндоган, Де Брюйне, Фоден, Торрес, Жезус.

Пеп Гвардиола: "Ҳозирги пайтда совринлар ҳақида ўйламаяпман. Ўтган 3 йил мобайнида ҳам ёмон натижалар қайд этмадик. Бу қанчалик қийин бўлганлигини биламан. Қўл остимдаги футболчилардан кўнглим тўқ. Айнан улар туфайли ҳамон шу ердаман. Биз ўзимизнинг энг кучли ўйинларимизни кўрсатишда давом этишни истаймиз".

Жавоҳир Азимов тайёрлади