"Бугунги натижа "Пахтакор" ва "Насаф" ўртасидаги кучлини аниқламайди..."

Ўзбекистон Суперлигаси 24-туридан ўрин олган "Пахтакор" - "Насаф" баҳси якунланди. Унда томонлар 1:1 ҳисобида дуранг ўйнади.

Мазкур учрашув якунига етгач, SPORTS.uz сайти журналисти Яҳёхўжа Улуғхўжаев ўз телеграм каналида ўйин ҳақида ўз фикрларини ёзиб қолдирди.

"Ҳозир кўпчилик "Пахтакор"ни ўйиннинг финишини зўр ўтказганини "Насаф"дан кучли ўйнаганига боғлаб юбормоқда. Аслида (менимча, албатта) ундай эмас.

"Аждарлар"нинг бугунги рақибидан фарқли ўлароқ бир неча кун ичида Ўзбекистон кубоги ва ОЧЛда мавсумга баҳо қўядиган ўйинлари бор. Қўшимчасига, бу баҳсдаги ғалаба ҳам аслида ҳеч нарса бермаслигини қаршиликлар жуда яхши тушуниб турган эди. Агар бугун Тошкентда 3 очко қўлга киритилганда ҳам "Пахтакор" қолган ўйинларда очко йўқотмаслигини футболни ичидагилар аллақачон англаб бўлган.

"Пахтакор" кубок ва ОЧЛда муваффақиятсизликка учрагач, жон-жаҳди билан Суперлига олтин медаллари учун ҳаракат қилмоқда. Икки жамоа бугунги ўйинга икки хил ёндашувда келган.  "Насаф" эконом футбол ўйнаб, 1 очко билан ортга қайтди. "Пахтакор" эса бор-йўғини ташлади.

Якунда "шерлар" ўйинни эмас, мавсумни қутқариб қолиш учун ҳамла қилди.  Бугун ким учундир ҳаёт-мамот, яна ким учундир ҳеч нарсани ҳал қилмайдиган ўйин эди. Унинг натижаси улар орасидаги кучлини аниқламайди", - дейилади каналда.