Бундеслигада эски картина: “Боруссия” бу сафар ҳам бунга нуқта қўёлмайдими? (превью)

Бугун Тошкент вақти билан соат 22:30 да Мюнхендаги “Альянц арена”да “Бундеслига класикоси” бўлиб ўтади. Пешқадам “Бавария” ўз уйида анча қийин аҳволга тушиб қолган Дортмунднинг “Боруссия”сини меҳмон қилади. Ушбу учрашув, шубҳасиз, Германияда йил ўйини бўлиши аниқ, шу сабабли, мухлисларнинг бу ўйинга бўлган қизиқиши анча юқори. Биз эса, ўйин ҳақида батафсилроқ тўхталишни лозим деб топдик, ўйлаймизки, бу сиз учун қизиқ бўлади. Демак, бошладик!

Хабарингиз бор, Германия Бундеслигасида чемпион жамоа номи деярли 8 мавсумдан бери ўзгармаяпти. Ҳа, “Бавария”нинг даражаси бошқа Бундеслига клублариникига қараганда анча юқорилаб кетгани бор гап, бироқ барибир ўша жамоалар орасида мюнхенликлар учун бошқаларга нисбатан кўпроқ рақобат уюштира оладиган жамоа бўлиши керак. Айни шу таърифлар “Боруссия” Дортмундга жуда мос тушади. Эътибор берсангиз, “немис машинаси”нинг “асаларилар” билан ўтадиган 2-давра учрашуви одатда, сўнгги йилларда мавсум чемпиони номини аниқлаб беради ёхуд чемпионлик учун курашни янада авжига чиқариб юборади. Ушбу логика деярли 4-5 мавсумдан бери ўз тасдиғини топиб келмоқда. Шундай экан, бу ўйинни оддий дерби сифатида эмас, финалдек кўриш лозим. Дастлаб, жамоаларнинг ҳолатига тўхталамиз.

EvyAvP3WEAEGd_c

“Бавария”

Бундеслиганинг ортда қолган 23 туридан сўнг, 52 очко билан турнир жадвалини бошқариб турган “Бавария” ўтган мавсумдагига қараганда ўта енгилмасдек кўринмаяпти, назаримизда. Тўғри, тиғиз тақвим, оғир ўйинлар ҳамда декабр ойида ўтказилиши режалаштирилган Клублар ўртасидаги ЖЧнинг қолдирилганлиги ҳам бунга ўз таъсирини кўрсатган. Лекин, барибир жамоада муаммолар йўқ эмас. Яқингача жамоанинг бош мураббийи Ханс Дитер-Фликнинг раҳбарият билан трансферлар масаласида тортишиб қолгани-ю, унинг клубни тарк этиши мумкинлиги ҳақидаги хабарлар чиқиб турган эди. Бироқ Қатардаги Мундиал ўтгач, бундай хабарлар чиқмай қўйди: раҳбарият уни тушунди шекилли, бирин-кетин ажойиб трансферларга қўл урди. Уларнинг орасида “Лейпциг”дан харид қилинган Дайо Упамекано трансферини алоҳида таъкидлаб кўрсатсак, мақсадга мувофиқ бўлар эди. Кўпчилик, ёзда Упамеканонинг Мюнхенга келишини эшитгач, Германияда рақобат буткул тугашини тахмин қилишди. Бу тахмин қанчалик ўзини оқлашини келгуси мавсумда билиб оламиз. Хўш, жамоанинг кайфияти қандай? Улар барча турнирлар доирасидаги сўнгги 10 учрашувда 8 бор ғалаба қозонган, 1 та дуранг ва 1 та мағлубият қайд этган. Шуни алоҳида таъкидлаш жоиз: “Бавария” сўнгги 2 баҳсда рақиблари дарвозасига 9 та гол уришга муваффақ бўлди, бундан келиб чиқадики, жамоада гол уриш билан боғлиқ муаммо йўқ. Ягона айтарли муаммо - ҳимоя чизиғидаги камчилик. Павар йўқлиги сабабли унинг позициясида Флик Зюлени ўйнатишга мажбур бўлмоқда. Тўғри, бу қайсидир маънода ўзини оқлади - қанотда муваффақиятли ўйнаган Никлас голларда иштирок этди, бироқ гол ўтказиб юбормаслик ҳимоячи учун муҳимроқдек. Шу сабаб, жамоа Паварнинг қайтишини кутишга мажбур. Яхши хабар: Мюллер ва Гнабри асосий таркибга қайтиб, жамоага ёрдам беришни бошлаб юборишди - “гол машинаси” энди тинмайди.

Тахминий таркиблар: Нойер; Зюле, Боатенг, Алаба, Дэвис; Киммих, Горецка; Сане, Мюллер, Гнабри; Левандовски.

Evuu0zUXAAIK3w6

“Боруссия” Дортмунд

Бош мураббий Люсьен Фавр кетгач, унинг ўрнига тайинланган Эдин Терзич жамоани қабул қилиб олганидан сўнг, 4 та учрашувда ғалаба қозонишга муваффақ бўлди. Дортмундликлар Терзич қўлига ўтганидан кейин Чемпионлар Лигаси 1/8 финали доирасида “Севилья”ни меҳмонда енгди, Германия Кубоги чорак финалида эса Гладбахнинг “Боруссия”сини таслим этиб, ярим финалга йўл олди. Бундеслигада эса 2 осон рақиб (“Арминия” ҳамда “Шальке-04”)ни мағлуб этиб, сув ва ҳаводек зарур бўлган очколарни қўлга киритишди. Ушбу натижалардан сўнг, 4-ўриндаги “Айнтрахт” Франкфурт билан орадаги фарқ 3 очкогина қолди. “Асаларилар”нинг келаси мавсум ЕЧЛга чиқиш учун астойдил курашаётгани бежиз эмас. Сабаби жамоанинг ёш юлдузи Эрлинг Холанд клубда қолиши учун жамоа камида ЕЧЛга чиқиши шарт. Унинг ўзи буни айтган. Қайсидир маънода, бу мотивация ҳам. Майли, бу ўз йўлига. Асосий муаммо жароҳатдаги футболчилардадир. Жамоанинг асосий футболчилари ҳисобланувчи Жейдон Санчо, Рафа Геррейру, Аксель Вицель ҳамда Жованни Рейна бугунги ўйинда “Боруссия”га ёрдам бера олмайди. Лекин уларнинг ўрнини тўлдирувчи номзодлар ҳам йўқ эмас, шу сабаб, дортмундликлардан кўп нарса кутамиз. Улар бугун ғалаба қозонадиган тақдирда, кучои тўртликка кириб олади ва “Бавария”нинг чемпионлик пойгасидаги шаҳдам юришига нуқта қўяади. Айни дамда мюнхенликларни “Лейпциг”дан атиги 2 очко ажратиб турибди. Шундай экан, “сариқ-қоралар”нинг ғалабаси чемпионат интригаси нуқтаи назаридан ҳам ўта муҳим аҳамият касб этади.

Тахминий таркиблар: Хитц; Морей, Жан, Хуммелс, Шульц; Дилейни, Даҳуд; Азар, Бранд, Ройс; Холанд.

EvuvyH-WQAEhUKi

Мураббийлар фикри

Ханси Флик:

Дортмундликларга қарши баҳс ҳар доим ўзгача ўтади. Бунга тарихдан кўплаб мисоллар келтиришимиз мумкин. Улар билан ўтган ўйинда доимо энг юқори даражада ўйнашга мажбур бўламиз. “Боруссия” - истеъдод ва маҳорат йиғилган жамоа. 

Бизнинг ўз ўйин стратегиямиз бор ва асосий мақсадимиз уларнинг ихчам ҳимоясини бузиб ўтиш. Бизда ҳам улардаги сингари улкан ҳужум салоҳияти мавжуд, бироқ ҳимояни ҳам унутиб қўймаслик зарур”.

Evt73PvXcAAEnrR

Эдин Терзич:

“Бавария” даҳшатли жамоа. Унга қарши аллақандай тактикалар ўйлаб топиш ва шу асосида ўйнаш, менимча, фойда бериши жуда қийин. Лекин, бундай ўйламаслигимиз керак. Ҳар қандай жамоа бир кун енгилади. Менинг мақсадим - “Боруссия”нинг “Бавария”га қарши ўйинлардаги ғалабасиз сериясига нуқта қўйиш. Бу жуда қийин, аммо иложи йўқ иш эмас. Худди шу ишни “Айнтрахт” ҳам амаллади. Демак, ҳаммаси ўз қўлимизда!

Introducing-Borussia-Dortmunds-new-manager-Edin-Terzic

Хулоса ўрнида

Бугунги ўйин ҳақида бирон тахмин билдириш ҳам хатодек, назаримизда. Шунчаки ўйиндан завқ олиш бугун бизга зарур. Икки гол машинаси тўқнашувининг ўзиёқ ҳаммани қизиқтириши аниқ. Шундай экан, ўйин зерикарли ўтмаслигига ишончимиз комил. Тахмин сифатида эса, мюнхенликларнинг минимал ҳисобдаги ғалабасини келтиришимиз мумкин, сабаби айнан уларнинг бугунги ўйиндаги имкониятлари кўпроқ тош босмоқда. Албатта, бу шунчаки тахмин. Барчаси майдонда ҳал бўлади!

Evv-mKqWEAAMnEy_1

Абдулла Маннонов тайёрлади.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар