"Буни ким ўйлаб топди, экан? - "Металлург" бош директори бош мураббий масаласи ва янги режалари хусусида

Бекободнинг “Металлург” клуби жорий мавсумда қандай ўйин кўрсатганини биласиз. Жамоа испаниялик мураббий Луисма Эрнандес қўли остида ўзидан ёмон таассурот қолдиргани йўқ.

“Металлург” бир қатор жамоаларга ҳамон ноқулай рақиб бўлиб келмоқда. Аммо уларнинг имконияти ҳозирги ҳолатидан ҳам юқорироққа кўтарилишга қодир эди. Чемпионатни 9-ўринда якунлайдими ёки ундан юқоридами, пастдами, буни охирида биламиз.

Сўнгги пайтларда мазкур клуб атрофида ҳам турли гап-сўзлар пайдо бўляпти. Sports.uz мухбири жамоа бош директори Шавкат Саидов билан алоқага чиқди.

- Хабарингиз бор, 2021 йилга нисбатан 2022 йилда жамоамиз таркиби 70-80 фоизга ўзгарди, - дея гап бошлади, Саидов. - Испан мутахассиси бошчилигида йил якунига етяпти. Умуман олганда, қониқарли. Лекин ташкилий томонларини, ҳамма вақт шароитлар, молиявий жиҳатдан ҳеч қанақа эътироз йўқлигини ҳисобга олганда, олдимизга 5-6-ўринларни эгаллаш вазифаси қўйилганди. Аҳамият берган бўлсангиз, футболда ўсиш ва пасайиш бўлади. Ўйлайманки, бу йил бироз барқарорлик бўлмади. Шунинг ҳисобига кўп дуранглар бўлди. Жамоамизнинг ҳимоявий ўйинига эътирозлар йўқ. Ҳужумда муаммолар кўзга ташланди. Статистик маълумотлар ҳам кўрсатиб турибдики, кам гол урганмиз. Охирида яна бир ўйин бор ва имкониятимиз ёмон эмас. Бир сўз билан айтганда, натижаларни қониқарли, деб ҳисобласак бўлади. Янги мураббий, янги таркиб билан ёмон қатнашмадик.

- Бош мураббий Луисма Эрнандеснинг клубдаги кейинги тақдири нима бўлиши қизиқтиряпти. “Металлург”ни мураббий бўйича позицияси қандай? Ҳамкорлик давом эттириладими ёки...

- Аслини олиб қараганда, ҳар бир мураббий ёки футболчи билан шартномаси ниҳоясига етаётганига олти ой қолганида албатта раҳбарият томонидан қандайдир қарорга келиши керак. Чунки уларни келажакдаги режалари бўлади. Шунга асосан шартномани тезроқ узайтириш ёки бекор қилиш керак бўлади. Раҳбарият билан келишган ҳолда бош мураббий масаласига охирги турдан кейин ойдинлик киритилади. Бизнинг ягона ҳомийимиз – “Узметкомбинат”. Унинг ҳар доим кейинги йил учун режалари мавсум якунидан кейин бўлади. Ҳозирча бу ҳақида аниқ бир нима дея олмайман. Луисма Эрнандеснинг кўрсатган натижаларини қониқарсиз деб ҳисобламайман. Лекин бундан ҳам яхши натижаларга эришиш мумкин эди.

- У билан тузилган шартнома ниҳоясига етяптими?

- Ҳа, бу йил тугайди.

- Клуб унинг ўрнига Питер Хюистра ва яна бошқа мутахассислар билан музокаралар олиб борилаётгани ҳақида эшитмоқдамиз. Булар ҳақиқатга тўғри келадими?

- Мен ҳам бу хусусида ижтимоий тармоқларда ўқидим. Мен учун бу янгилик бўлди. Хюистра билан ҳеч қандай музокара олиб борилмаган. Билмадим, буни ким ўйлаб топди, экан? Масалан, мени умуман хабарим йўқ.

- Умуман, қайсидир мураббийлар билан музокараларга киришганмисизлар?

- Йўқ, ҳозирча бош мураббий номзоди ҳақида гап бўлгани йўқ ва кўриб чиқилмаяпти ҳам. “Узметкомбинат”да ҳар йили декабрь ва январь ойларида нафақат футбол, балки бошқа йўналишларда ҳам йил якунида сарҳисоб қилинади. Чунки комбинатимиз тартиби шунақа. Шунинг учун ҳозирча бу савол очиқ қолади.  

- Футболчилар масаласида режалар қандай? Масалан, шартномани узайтириш ёки ҳамкорликни тўхтатиш юзасидан аниқ маълумотлар кўриб чиқиляптими?

- Режаларимизни бош мураббий билан ҳам кўриб чиқдик. 90 фоиз футболчиларимиз билан икки йиллик шартномалар бор. Баъзи-бир ёшлар билан уч йиллик шартнома қилинган. Фақат 2-3 нафар ўйинчининг битими якунига етяпти. Аммо биз ҳам ўзимизга яраша режалар тузяпмиз. Айниқса, ҳужум ва ярим ҳимояни кучайтириш ҳақида ўйлаяпмиз. Келгусида 4-5 нафар янги футболчилар бўлиши мумкин. Раҳбарият бизга легионерлар масаласида имконият беряпти. Келаси мавсумга легионерлар ҳам келиши кутилмоқда.

Шуҳратбек Жўраев.