“Bunyodkor” yarim himoyachisi uchun Rossiya klubidan 1 million dollar talab qildi

Qozonning "Rubin" klubi "Bunyodkor"ning 18 yoshli futbolchisi Umarali Rahmonalievni o‘z safiga qo‘shib olmoqchi, deb xabar beradi “Metaratings” nashri.

Manbaga ko‘ra, “qaldirg‘ochlar” rahbariyati yarim himoyachi uchun bir million dollar talab qilmoqda. Rahmonalievning o‘zi "Rubin" bilan shartnoma imzolashga qarshi emas. Agar “Bunyodkor” futbolchini Qozon klubiga o‘tishiga to‘sqinlik qilsa, u holda toshkentliklar bilan shartnomasini bir tomonlama bekor qilishga tayyor.

Futbolchining “Bunyodkor” bilan shartnomasi 2022 yilning oxirigacha amal qiladi. Joriy mavsumda u klubning barcha musobaqalar 13 ta o‘yinda maydonga tushib, 6 ta gol o‘z hisobiga yozdirib qo‘ygan.

“Transfermarkt” portali Rahmonalievning narxini 200 ming evroga baholamoqda.