"Bunyodkor"da nima gaplar?

Shuhrat Maqsudov murabbiyligidagi “Bunyodkor” yangi mavsumga tayyorgarlikni boshladi. Bu haqda klub matbuot xizmati xabar berdi.

Manbaning ma’lum qilishicha, 20 dekabrdan e’tiboran “Bunyodkor” akademiyasida yig‘inga kirishgan “qaldirg‘ochlar” tarkibida o‘zgarishlar yo‘q. Yig‘in 2021 yilgi mavsumni jamoa safida o‘tkazgan futbolchilar bilan davom etmoqda.

Kuniga bir mahaldan o‘tkazilayotgan mashg‘ulotlarda asosan jismoniy tayyorgarlikka ahamiyat berilyapti. Mashg‘ulotlar maydonda va “trenajyor zalida” o‘tkazilmoqda. 29 dekabrga qadar davom etadigan mashg‘ulotlarning so‘nggi kunida nazorat uchrashuvi o‘tkaziladi. Unda jamoa ikki tarkibga bo‘lingan holda maydonga tushadi.