Бразилия терма жамоаси ҳамда “Барселона” ва "Бунёдкор" клубларининг собиқ ҳужумчиси Ривалдо каталонияликлар раҳбариятига ёзда “Манчестер Сити”дан кетишини эълон қилган аргентиналик ҳужумчи Серхио Агуэрони қўлдан чиқармасликни тавсия қилмоқда.

“Агуэронинг келиши Каталония клуби учун ажойиб юриш бўларди. У дарҳол жамоанинг асосий ҳужумчисига айланади. Аргентиналик футболчи Луис Суаресдан сўнг пайдо бўлган йўқотишни қоплайди. Бундан ташқари, Серхио ҳамюрти Лионель Месси билан ҳам жуда яхши муносабатда. Ушбу трансфер Леони “Камп Ноу”да қолишга кўндириши мумкин”, - деди Ривалдо Goal.com нашрига берган интервьюсида.

Мессининг “Барселона” билан амалдаги шартномаси шу йилнинг ёзида ўз ниҳоясига етади. Томонлар келишувни узайтириш бўйича бир қарорга келгани йўқ.

“Манчестер Сити” эса 32 ёшли Агуэронинг кетишини расман эълон қилди. Серхио 2011 йилдан буён “шаҳарликлар” шарафини ҳимоя қилиб келаётган эди. У жамоа тарихидаги энг яхши тўпурарлардан бири ҳисобланади.

Матнда хатолик топсангиз, ўша хатони белгилаб, бизга жўнатинг (Ctrl + Enter)