"Бунёдкор"нинг хўжайини ўзгарди

«Ўзтрансгаз» «Бунёдкор» футбол клуби устав фондидаги 61,8 фоизлик улушини (715,37 миллион сўм қийматидаги акциялар) Давлат активларини бошқариш агентлигига ўтказади. Бу ҳақда «Forbes.uz»га таяниб, Дарё интернет нашри хабар бермоқда.

Унга кўра, 14 апрелда ўтказилган акциядорлар кенгашининг навбатдан ташқари йиғилишида шундай қарор қабул қилинган.

Шунингдек, «Ўзтрансгаз»нинг Тошкент шаҳар, Яккасарой тумани, Юсуф Хос Ҳожиб кўчаси, 31-уйда жойлашган биноси ҳам ноль қийматда Давлат активларини бошқариш агентлигига берилади. Агентликнинг Шаҳрисабз кўчаси, 85-уйда жойлашган 10 қаватли биноси эса «Ўзтрансгаз» ихтиёрига ўтказилади.

Хабарга кўра, ушбу чоралар акциядорлик жамиятининг устав капиталидаги давлат улушини камайтириш учун қилинмоқда. Айни кунларда компаниядаги давлат улуши 609,26 миллиард сўмни ташкил этади.

Шунингдек, йиғилишда кузатув кенгашининг айрим аъзоларининг ваколатлари тугатилиб, янги таркиб тасдиқланган.