"Бургутлар" "Пахтакор" стадионида, аммо мезбони бошқа ёхуд рақамлардаги устунлик қанчалик фойда беради?

“Андижон” 2-тур учрашувини ҳам яна меҳмонда ўтказади. Бу сафар Тошкентдаги “Пахтакор” стадионида “Сурхон” клубига қарши майдонга тушади.

Хабарингиз бўлса, “Сурхон” уй ўйинларини вақтинча мезбон сифатида “Пахтакор” стадионидан фойдаланиб турибди.

Чемпионатнинг дастлабки турида “Сурхон” ОКМКга қарши учрашувда 3:1 ҳисобида мағлубиятга учраган бўлса, “Андижон” Қаршида “Насаф”ни 0:1 ҳисобида енгиб қайтди. Ҳозирда асосий эътибор “Сурхон”га қарши баҳсга қаратилган.

Ушбу жамоалар охирги бор 2021 йили ўзаро тўқнаш келишган. Андижондаги учрашувда майдон эгалари 1:0 ҳисобида ғолиб чиққан. Иккинчи даврадаги тўқнашувда “Сурхон” 2:0 ҳисобида устун келган.

Мазкур клубларнинг чемпионатимиз тарихидаги ўзаро ўйинлар статистикасига келадиган бўлсак, бунга қадар “Сурхон” ва “Андижон” 30 маротаба майдонда тўқнашишган. Қарама-қаршиликлардаги устунлик “Бургутлар” тарафида.

Бу рақамларда ҳам акс этган. Айтайлик, “Сурхон”нинг ҳисобида 9 та, “Андижон”да эса 16 та ғалаба бор. 5 та ўйинда кучлар тенг келиб қолган. Тўплар нисбати 37\57 “Андижон” фойдасига.

Энг йирик ғалабалар ҳам “Андижон”нинг фойдасига ҳал бўлган. Жумладан, 5:1, 6:2, 3:0, 4:0, 0:5 натижалари билан “Сурхон” тор-мор этилган ўйинлар кузатилган. Шунинг учун ҳам “Андижон” клуби “Сурхон”га қарши беллашувларда яхшигина устунликка эга.

Ҳар икки жамоа таркибида янги мавсум олдидан ўзгаришлар кузатилганини биласиз. Раҳбариятдан тортиб ўйинчиларгача янгилар таклиф қилинди. Масалан, “Сурхон”да бош мураббий мавсум бошланиши арафасида яна ўзгарди ва Про лицензияси бор бўлган Сергей Арслоновга бу лавозим топширилди. Қишки йиғинни Сергей Токов бошчилигида ўтказишди. У ҳам “Оқтепа” академиясидан олиб келинди. Бироқ унда Суперлигада бош мураббийлик қилиш учун тегишли лицензия бўлмагани учун Рауф Инилеев таклиф қилинди. Унда бор эдию, аммо эшитишимизча, муддати эскирган экан. Бу пайтда 1-тур яқинлашиб қолганди. Кейин Сергей Арслонов номзоди маъқулланди. Таркибга кейинчалик янги ўйинчилар таклиф қилинди.

Айтиш мумкинки, “Сурхон”нинг илк турда ОКМКга 3:1 ҳисобида мағлуб бўлгани оддий қабул қилинди. Чунки рақиб “Сурхон”га қараганда тажрибалироқ эди. Термизликларда эса янги жамоа ва энди шаклланиш жараёнида. Лекин 2-турга астойдил тайёргарлик кўраётгани табиий. Ахир ким ҳам кетма-кет мағлубиятлар қайд этишни истайди? Ҳеч ким. Фақат бунинг учун улар “Андижон” ҳимоясини ёриб ўтиши шарт. Кўрдикки, илк турда “Андижон” сафарда “Насаф” майдонида мезбонларнинг ҳужумларига бардош бера олди ва қайтанга қарши ҳужумдан гол уриб ютиб кетди. Бу томондан қараганда, андижонликларда ҳозир кайфият аъло даражада. Улар кетма-кет иккинчи ғалабани қўлга киритиб, мухлисларини яна хурсанд қилишни ва шу орқали турнир жадвалида юқорироқ поғоналарга кўтарилмоқчи.

Дарвоқе, “Андижон”нинг мавсумни ёқимли ғалаба билан бошлаганидан кейин энди Андижондан “Пахтакор” стадионига янада кўплаб мухлисларнинг келиши кутилмоқда.

Бу ўйин ҳақиқатан қизғин ва ҳужумкор руҳда ўтади. Энди “Андижон” ҳам биринчи учрашувга нисбатан бу сафар янада ҳужумкорроқ тактика асосида ўйин қуриши мумкин. Қолганини беллашувдаги воқеалар жараёнида билиб оламиз. Баҳс 11 март куни соат 17:00 да бошланади.  

Шуҳратбек Жўраев.