"Бухоро" билан шартномасини узайтирган Муҳаммадиевнинг янги мавсум учун режалари қандай?

«Мавсум-2019»ни бир текисда ўтказа олмаган «Бухоро» клуби сал қолса Суперлига билан хайрлашарди. Ҳаммаси эса охирги турда ҳал бўлди. «Бухоро»нинг сўнгги турда қўлга киритган қийин ғалабасидан сўнг Суперлигада қолиш вазифасини уддаладилар. Мавсумнинг ярмидан жамоага бош мураббий этиб тайинланган тожикистонлик Муҳсин Муҳаммадиев эса қийинчилик билан бўлса-да, «Бухоро»ни кучлилар орасида сақлаб қола олди. Кўпчиликни эса мураббийнинг кейинги тақдири қандай кечиши қизиқтираётганди. Яъни, клуб Муҳаммадиев билан ҳамкорликни яна давом эттирадими ёки бошқа вариантлар кўриб чиқиладими, деган савол ўртага ташланганди. Бироқ якунда «Бухоро» тожикистонлик мутахассис билан янги мавсумда ҳам ҳамкорликни давом эттириш бўйича келишувга эришди. Шу тариқа, Муҳаммадиевга яна ишонч билдирилди. Айни пайтда эса бухороликлар ушбу мураббий бошчилигида янги мавсумга ўз қароргоҳида тайёргарликни олиб бормоқдалар. Куни кеча ушбу мураббий билан боғланиб, янги мавсум режалари, чемпионат ҳақидаги таассуротлари, таркибдаги ўзгаришлар ва яна бошқа масалаларда суҳбатлашдик.

- Муҳсин Муслимович, жамоангиз билан янги мавсумга тайёргарликни бошлаб олдингиз. Айтинг-чи, қишки режалар қандай?

- Ҳа, 20 декабрдан жамоа Бухоро шаҳрида йиғилди. Биз дарҳол футболчилар билан шартномалар тузишни бошлаб юборганмиз. Аммо ҳозирча асосан ёшлар билан келишувларга эришяпмиз. Кейинги йиғинимиз эса 5 январдан 19 январгача ташкиллаштирилади. Умуман олганда, биз тайёргарлик режаларимизни босқичларга бўлиб чиққанмиз. Масалан, кейин Тошкентда шуғулланамиз. Февралда эса Туркияда йиғин ўтказишни мўлжаллаб турибмиз.

- Демак, хорижда йиғин ўтказиш режаси жиддийми?

- Ҳаммаси бюджетга бориб тақалади. Агар бу борада ҳаммаси жойида бўлса, у ҳолда албатта хориж йиғинига борамиз.

- Янги футболчилардан кимлар шуғулланяпти?

- Ҳозирча таркибимизда янги ўйинчилардан ҳеч ким йўқ. Боя айтганимдек, ҳаммаси бюджетга бориб тақалади. Биз айнан маблағимизга қараб футболчиларни таклиф қиламиз ва шартномалар тузамиз.

- Яқинда сизнинг клубда қолиб янги мавсумда ҳам «Бухоро»ни бошқаришингиз аниқ бўлди. Клуб билан расман шартномангизни узайтирдингизми?

- Ҳа, мен шартномамни узайтирдим.

- Шартномангизни қанча муддатга узайтирдингиз?

- Бир йилга мўлжалланган.

муҳаммадиев2

- Ундай бўлса, мураббий сифатида шахсий вазифа сифатида олдингизга қандай мақсадларни қўйдингиз?

- Менинг шахсий мақсадим юқори ўринлар учун курашиш. Лекин бу биргина менинг хоҳиш ва иштиёқим билан боғлиқ ҳолат эмас. Биласиз, яхши савиядаги футболчилар шунга яраша катта маош оладилар. Барибир ҳаммаси маблағга боғлиқ. Агар бюджет яхши бўлса, шунга яраша ўйинчиларни олиб келиб юқори ўринларга курашса бўлади.

- Умуман айтганда, таркибда жиддий ўзгаришлар бўладими?

- Тўғри, биз ҳам жамоамизни кучайтирмоқчимиз. Бу борада ўзимизга керакли бўлган футболчилар билан гаплашмоқчимиз ва кучайтиришга ҳаракат қиламиз. Ўйинчилар билан музокара олиб боришга тайёрмиз, аммо улар ҳали биз билан шартномага қўл қўйишга шошилишмаяпти. Ким қолиши ва ким кетиши янги йилдан кейин аниқ бўлади. Ҳозир эса бу борада дабдурустдан жавоб қайтара олмайман.

- Лекин эшитишимча, жамоангиз сардори ва етакчиси Саламат Қуттибоевнинг «Металлург»га кетаётгани ҳақида гап-сўзлар юрибди…

- Бу ҳали фақат миш-миш холос. Ҳозирча «Бухоро»ни расман ҳеч ким тарк этгани йўқ.

- Ушбу мавсумда «Бухоро»да тўп сурган легионерлар ҳақида нима дея оласиз? Ишончингизни оқлай олишдими?

- «Бухоро»да ўйнаган легионерларимизни яхши савиядаги футболчилар деб ҳисоблайман. Милован Капор, Фатхулло Фатхуллоев, Жаба Липартия каби ўйинчиларнинг жамоамизга фойдаги тегди. Албатта, чемпионат давомида кимнингдир ўйини чиқди, кимнидир ўйини кўнгилдагидек бўлмади. Лекин легионерларимиздан кўнглим тўлди. Муҳими, биз Суперлигада қолдик ва ҳар бир футболчимиз бу борада ўз ҳиссаларини қўша олишди.

муҳаммадиев3_2

- Ўша легионерлар билан яна ҳамкорлик давом эттириладими ёки…

- Албатта, улар жамоамизда қолса яхши бўларди. Шундай экан, легионерларимизни таркибда сақлаб қолиш режамизда бор. Аммо биз шу билан биргаликда яна бошқа легионерларни ҳам кўриб чиқмоқчимиз. Айни пайтда эса бу борада яна бошқа номзодларни ҳам кўриб чиқяпмиз.

- Бу мавсумда «Навбаҳор» сафида тўп сурган тожикистонлик ҳимоячи Амирбек Жўрабоев ўзидан ёмон таассурот қолдиргани йўқ. Айтишига қараганда, у билан Тожикистоннинг «Истиқлол» клубида бирга ишлаган экансиз. Шу боис футболчи сиз ҳақингизда илиқ фикрларни билдирганди. Уни жамоангизда кўришни истайсизми?

- Албатта, Амирбекни жамоамизга таклиф қилишни хоҳлардик. Лекин унинг шартномаси борми-йўқми, шунисига ҳам қараш керак. Жўрабоевни мен яхши биламан. Биласизми, уни «Навбаҳор»га таклиф қилишганида жамоа мураббийи мендан бу футболчи ҳақида маслаҳат сўраганида ижобий фикрларимни айтганман. Тўғриси, уни «Бухоро»да кўришни хоҳлайман.

- Муҳсин Муслимович, якунига етган мавсум сизга ёқди дейиш мумкинми?

- Мавсум кимга ёққан бўлиши мумкин? Фақат «Пахтакор»га. Чунки улар чемпион бўлишди ва яна иккита Кубокни қўлга киритишди. Бундан ташқари, яна айрим клубларга ҳам ёққан бўлиши мумкин. Суперлигада жон сақлаб қолиш учун курашадиган жамоаларга эса албатта мавсум ёқмаслиги тайин. Ахир ким ҳам нуқул жон сақлаб қолиш учун ўйнашни хоҳларди? Хурсанд қилган томони шундаки, биз Суперлигада қолдик. Шунисидан мамнунман. Янги мавсумда эса раҳбарларимиз ва мухлисларимизни яхши натижаларимиз билан хурсанд қилишни истаймиз.

- Умуман, сиз учун қайси жамоалар сюрприз бўлди?

- Аввало айтишим керакки, «Пахтакор» ҳаммадан бир бош устунлигини кўрсатиб, қўлга киритган муваффақиятларига ҳақли равишда эришди. Иккинчи ўринни эгаллаган «Локомотив» ҳам кучли жамоа саналади. Учинчи ўринни олган «Бунёдкор» эса нафақат мени, балки бошқаларни  ёқимли тарзда ажаблантира олди. Айнан «Бунёдкор» сюрприз кўрсатди дейиш мумкин. Чунки уларни ёшлар билан учинчи ўринни эгаллашларини ҳеч ким кутмаган бўлса керак. Бундан ташқари, Жиззахнинг «Сўғдиёна» клуби ҳам ўзидан яхши таассурот қолдирди. «Насаф» ҳам мавсумни яхши бошлаганди. Аммо кейинчалик уларга барқарорлик етишмади. Ваҳоланки, қаршиликлар ҳам аслида юқори ўринлар учун курашишга қодир жамоа эди. Тўғриси, «Насаф»дан кўп нарса кутгандим. Қолган клубларнинг барчаси эса жой-жойларида. Яъни, қайси ўринни эгаллаши керак бўлса, ўша жойларда бўлишди.

- Мутахассис сифатида чемпионатимиздаги савия борасида ҳам ўзгаришни сездингизми ёки йўқми?

- Савияни ёмон деб айта олмайман. Бироз  бўлса-да, мавсумни қизиқарлироқ ўтди деб айтишим мумкин. Тўғри, чемпионатда ғолиблик анча олдин ҳал бўлиб қолди. Лекин 2-3-ўринлар учун жиддий кураш кечди. Қолаверса, Суперлигадан тушиб кетмаслик учун ҳам интрига яхши кечди. Жамоалар бу борада охиригача курашишди.

муҳаммадиев4_1

- Муҳсин Муслимович, сизнинг ушбу мавсумда «Бухоро»даги статистикангизни қониқарли даражада бўлмади. Рақамлар шуни кўрсатиб турибдики, ғалабангиздан кўра дуранг билан айниқса, мағлубиятларингиз кўпроқ бўлди…

- Статистикам ҳақида гапирадиган бўлсам, тўғри кўпроқ ютқаздик ва дуранг ўйнадик. Лекин биз асосан сафарда яхшироқ ўйин кўрсатдик. Ўз уйимизда эса нимагадир ўйинимиз унчалик ўхшамади. Натижада ўзимиздаги баҳсларда ғалабаларимиз камроқ бўлди. Энди шу камчиликларимизни янги мавсумда албатта тўғрилашимиз керак. Биз уйда ҳам, сафарда ҳам ютишга ҳаракат қиламиз. Лекин ўз майдонимизда ютишга мажбурмиз. Чунки биз бундай пайтда ўз мухлисларимиз олдида ўйнаймиз.     

- «Бухоро»ни кучайтириш масаласида гап кетар экан, кўпроқ қайси чизиқларда муаммолар кўп деб ўйлайсиз?

- Иложи борича барча чизиқларимизни кучайтиришимиз керак. Дарвозабонимиз Раҳимжон Давроновни «Машъал»дан ижарага олгандик. Аммо унинг ижара муддати тугаган. Биз эса «Машъал» билан унинг масаласида гаплашяпмиз. Бироқ уни қайтариш биз учун қийин бўлса керак.

- Умуман айтганда, янги футболчилар билан музокаралар бошланганми?

- Ҳа, биз ҳозир футболчилар билан гаплашяпмиз. Кимдир ўйлаяпти, яна кимдир бошқа клуб билан келишиб қўйган. Мухлислар ҳам жамоа кучли бўлиши учун шунга яраша ижрочиларни олиб келишимизни хоҳлашади. Биз эса бу иш билан ҳар куни шуғулланяпмиз.  

- Бунинг учун молиявий томондан барқарорлик ҳам зарур шундайми?

- Албатта, молиявий томондан имкониятлар яхши бўлса, шунга яраша ўйинчиларни таклиф қиламиз. Тўғри, раҳбарларимиз ҳам жиддий эътибор қаратишяпти. Шу сабабли молиявий имкониятимизни ўзгартиришга ҳаракат қиляпмиз. Кўп нарса эса пулга боғлиқ. Масалан, яхши ўйинчи олиб келиш ҳам маблағга бориб тақалади.

- Сизга бунгача бошқа клублардан таклифлар ҳам бўлдими?

- Таклиф бўйича мен ҳеч ким билан гаплашганим йўқ. Чунки «Бухоро» билан шартномамни узайтирдим. Бу хабар оммага ҳам эълон қилинган. Шундай экан, энди менга таклиф билдиришнинг нима фойдаси бор? Менинг бутун эътиборим «Бухоро»га қаратилган.

- Январь ойида олимпия терма жамоамиз Осиё чемпионатида қатнашади. Мутахассис сифатида бизнинг имкониятларимизни қандай баҳолаган бўлардингиз?

- Олимпия терма жамоасининг имкониятини юқори деб ҳисоблайман. Чунки терма жамоада қўлидан кўп нарса келадиган футболчилар бор. Таркиб яхши шаклланган. Ўйлайманки, улар Осиё чемпионатида ўзларини кўрсатиб, яхши натижаларга эришишга қодир. Биз терма жамоага мухлислик қиламиз.

 

Фикрлар

Фикр қолдириш учун авторизациядан ўтинг!
Eshon Eshtop
29/12/2019 21:16
Qaysi qo'y yozdi vesthemni 19 o'rida deb
Расулжон Тоштемиров
27/12/2019 12:11
Интилганга толе ёр дейли лекин мухсинда интилиш уртача бохона купда
Mirali Hcerali
27/12/2019 10:47
Яхши мухсин ва бухорога келди йор булсин