"Бухоро" бош директори: "Натижа қониқарли эмас, ҳаммасини бош мураббийга қўйиб бергандик. Энди эса..."

Ўз олдига Суперлигага қайтиш вазифасини қўйган “Бухоро” ҳозирча натижалари билан мақтана олмаяпти. Боиси, 13 та турда клуб 21 очко билан 4-ўринни эгаллаб турибди.

Про лига ёзги танаффусга чиқди ва клублар энди таътилда. Янги ойдан йиғинларга киришилади. Энди барча жамоалар тайёргарликка ҳамда селекция ишларига эътибор қаратади.

“Бухоро” ҳам бу борада жим турмоқчи эмас. Клуб бош директори Ўткир Қодиров айрим саволларимизга жавоб қайтарди.

- “Бухоро” жамоасининг ёзги тайёргарлик режаси қандай?

- Жамоа аъзоларига бир ҳафталик таътил берганмиз. 2 июль куни барчасини йиғаман. Бош мураббий билан шундай қарорга келганмиз. Ўша куни ҳамма футболчи Бухородаги қароргоҳимизда тўпланади. Шу ерда бир ҳафталик машғулот бўлади. Шундан кейин қаерда йиғин ўтказишимиз ҳозирча аниқ эмас. Режамизда Тошкентда шуғулланишимиз ҳам мумкин.

- Клуб раҳбари сифатида ортда қолган 13 та тур бўйича “Бухоро”нинг иштирокига қандай баҳо берган бўлардингиз?

- Ҳа, 13 та тур ўтди. Очиғи, фикрим унчалик яхши эмас. Чунки ижобий натижалар кўрсатганимиз йўқ. Тўғри, кучли бешталикда турибмиз, жадвалда 4-поғонадамиз. Аммо бу мени қониқтираётгани йўқ. Бизни хурсанд қиладиган ҳолат эмас. Трансфер ойнаси очилганида жамоамизга 7-8 нафар футболчи олиб, таркибни имкон қадар кучайтирмоқчимиз.

- “Бухоро”да таркиб яхши эди, шароит яратилган, маблағ масаласида жиддий муаммо йўқ. Қизиқ, нима етишмаяпти, яна?

- Қарздорлигимиз йўқ. Ўтган йилги қарздорликлар учун деярли 4 миллиард сўм сарфладик. Ишчи-ходимлардан, футболчилардан қарзимиз йўқ. Молиявий жиҳатдан муаммо йўқ. Нима дейишга ҳам ҳайронман. Мураббий келса, биргаликда ўтириб, буни яна муҳокама қиламиз. Биз томондан барча шароитлар яратиб бериляпти, пуллар вақтида тўланяпти. Ҳаммасини мураббийга қўйиб бергандик, жамоага бирорта ўйинчини таклиф қилмадик, барчасини бош мураббийнинг ўзи истаб чақирган. Энди ёзда таркибнинг 30-40 фоизини алмаштиришга ҳаракат қиламиз.

- Барибир Фузайлов яхши натижа қила олмаяпти, жамоадан кетиши мумкин, деган гап-сўзлар юрибди. Раҳбариятни бош мураббий бўйича позицияси қандай? Ёки бошқа вариантлар кўриб чиқиляптими?

- Вариантларни ўйлаб кўрамиз. Ҳозирча бир қарорга келганимиз йўқ. 2 июль куни Ҳаким Фузайлов бошчилигида йиғинни бошлаймиз. Унгача раҳбарлар билан маслаҳатлашиб кўрамиз.

- Ростини айтинг-чи, Фузайловга нисбатан раҳбариятнинг ишончи қолганми?

- Ишончи қолган. Ҳали раҳбарият мураббий масаласида менга ҳеч қанақа эътироз билдиришгани йўқ. Бу масала бўйича барчамиз гаплашамиз. Фақат Ҳаким Қаюмович бир-икки марта ўйинлардан кейин кетишим мумкин, деган гапларни айтганди. Шунда мураббийга орқага йўл йўқ, жамоани биргалашиб олдикми, охиригача курашиб, Суперлигага олиб чиқишимиз керак, деб айтдим. “Турон”га ютқазганимиздан кейин ҳам кетиш ҳақида гап очганида “Зомин” билан баҳсга жамоани ўзи тайёрлашини айтганман. Ҳозирча Ҳаким Фузайлов биз билан бирга.

- Ҳозирги пайтга келиб қайси футболчилар билан хайрлашилди?

- 2 июль куни йиғилайлик. Ҳали бир қарорга келганимиз йўқ. Бу масалада мураббийни ҳам фикрини эшитмоқчиман. Бир ўзим қарор чиқармайман. Футболчиларни мураббий ўйнатади. Қайси бири керак эмаслигини ўзи айтади. Легионерларга жавоб бермоқчи эдик. Ҳозирча бир ҳафталик таътилга чиқишган, улар ҳам.

- Янги футболчилардан кимлар билан келишувга эришилди?

- Трансфер ойнаси очилсин. Албатта, кўз остимизга олиб қўйилган футболчилар бор. Улар билан музокара олиб борилади. 5-6 та ўйинчилар рўйхатимизда турибди.