"Buxoro"dan so‘nggi yangiliklar: tarkib o‘zgaradi, bosh murabbiy esa... yoxud yozgi transfer oynasida klubni nimalar kutayotganini bilasizmi?

Ko‘rib turibsiz, pro ligada Superliga yo‘lidagi kurash juda shiddatli tus olyapti. Har bir uchrashuv, ayniqsa, yuqori o‘rinlardagi jamoalar ishtirokidagi bahslar g‘oyat tomoshabop ruhda o‘tyapti. Qiziqarli va hujumlarga boy o‘yin guvohiga aylanyapmiz.

O‘z oldiga elitaga qaytishni maqsad qilib qo‘ygan klublar orasida “Buxoro” ham borligini bilasiz. O‘tgan yilgi kabi bu yil ham Superligaga qaytish asosiy vazifa qilib belgilangan. Yuqorida aytganimizdek, pro ligadagi kurash juda jiddiy va intriga ham shunga yarasha davom etyapti. Aytmoqchimizki, hech bir jamoaga oson emas, shu jumladan “Buxoro”ga ham. Ayni paytda turnir jadvalida ular 18 ochko bilan 4-o‘rinni egallab turibdi. Undan yuqorida “Turon”, “Andijon” va “Mash’al” jamoalari bor.

“Buxoro” klubi 12-turda asosiy raqobatchilaridan biri – “Turon”ga qarshi safarda maydonga tushdi. Ushbu bellashuvda buxoroliklar o‘z darvozasidan ikkita gol o‘tkazib yuborishdi va mag‘lubiyatga uchrashdi. Natijada 1-o‘rindagi klubdan 10 ochkoga ortda qolyapti, ikkinchi o‘rindagi jamoadan esa 7 ochkoga.

“Turon”ga qarshi bahsdan so‘ng, Sports.uz muxbiri “Buxoro” klubi bosh direktori O‘tkir Olimovich Qodirov bilan bog‘landi. Bundan maqsad klubning natijalari nima sababdan yaxshi tomonga o‘zgarmayotganini bilish edi. Bu masalada Qodirov shunday dedi:

"Hali hech nimani yo‘qotganimiz yo‘q. Oldinda o‘yinlar ko‘p. Tanaffus davrida tarkibni yanada kuchaytirishga harakat qilamiz. 7-8 nafar o‘yinchilarni almashtirish rejamiz bor. Har qanday holatda ham orqaga chekinmoqchi emasmiz. Oldinda kuchli beshtalikka kirish o‘yinlari bor. Biz uchun orqaga yo‘l yo‘q, o‘zimiz uchun ijobiy natijaga erishamiz, deb umid qilaman".

Shuningdek, oxirgi paytlarda bosh murabbiyning ham kursi qimirlab qolgani va “Turon”ga qarshi uchrashuv Hakim Fuzaylov uchun oxirgi imkoniyat ekanligi haqidagi gaplar ham quloqqa chalindi. O‘yindan keyin esa bosh murabbiy yana bir bor iste’fo haqida gapirib, bu borada rahbariyat bilan gaplashib olmoqchiligini aytdi. Mutasaddilar murabbiyga ishonyaptimi? Shulardan kelib chiqib, klub bosh direktoridan Fuzaylov masalasida ham so‘radik.

"Oldimizda “Zomin” jamoasiga qarshi o‘yinimiz bor. Hakim Fuzaylov ushbu uchrashuvga ham jamoani o‘zi tayyorlaydi. O‘ylaymanki, Hakim Qayumovich boshlagan ishini o‘zi oxirigacha davom ettiradi. Balki matbuot anjumanida iste’fo haqida hissiyotlarga berilib gapirib yuborgan bo‘lishi mumkin. Lekin biz bu masalada bir qarorga kelganimiz yo‘q. 24 iyun kuni “Zomin” bilan uchrashuvga tayyorlanamiz. Fuzaylov Buxoroda. Iste’fo haqida u kishi bilan gaplashganimiz yo‘q".

Rahbariyat jim turgani yo‘q va jamoani yanada kuchaytirish borasida bosh qotiryapti. O‘tkir Qodirov biz bilan muloqot chog‘ida ushbu masalaga ham to‘xtalib o‘tdi.

"Yozgi transfer oynasi ochilgan mahalda hujum chizig‘ini va markazni kuchaytirishga harakat qilamiz. Bundan tashqari, o‘ng va chap qanot yarim himoyachilarini ham olishimiz mumkin. Bu borada futbolchilar bilan muzokaralar olib borilmoqda. Transfer oynasi ochilganida hammasini hal qilib olamiz. Legioner o‘yinchilar bilan xayrlashmoqchimiz, asosan mahalliy futbolchilarni olmoqchimiz. Albatta, mag‘lubiyatlar hech kimga yoqmaydi. Muxlislarimizni ham to‘g‘ri tushunamiz. Ularga ham g‘alaba kerak. Albatta, biz ishqibozlarimizni ishontirib ayta olamizki, yaxshi natijaga erishamiz, deb umid qilaman, - deydi bosh direktor".