“CAFA NATIONS CUP”. Эрон Афғонистонни "янчиб ташлади"

“CAFA NATIONS CUP” турнирининг 2-турида Эрон ва Афғонистон терма жамоалари беллашди. Учрашув Эрон термасининг йирик, 6:1 ҳисобидаги ғалабаси билан якунланди. 

Дастлаб, 20 дақиқада чап қанотдан узатиб берилган тўпни Сардор Азмун боши билан дарвозага аниқ йўллаб ҳисобни очди. Орадан бир дақиқа ўтиб Меҳди Тареми ҳисобни иккитага ошириб қўйди. 27 дақиқада Эрон пенальти тепиш имкониятига эга бўлди ва Тареми бу вазиятдан унумли фойдаланиб, дублга эришди. Биринчи бўлимнинг сўнгида Азмуннинг ақлли узатмасидан Алиризо Жаҳонбаҳш фойдаланиб, ҳисобни 4:0 кўринишига олиб келди. Биринчи тайм шу тариқа якунланди.

Бироқ бу ҳаммаси эмас эди. Иккинчи бўлимни кетма-кет ҳужумлар билан бошлаган Амир Галенои шогирдлари 52 дақиқада яна ўша 9 рақамли ҳужмчи Тареми гол уриб, хет-трикни расмийлаштирди. Орадан бир дақиқа ҳам ўтмай Афғонистон термаси сардори Фаршад Нур жарима зарбасидан супер зарба йўллаб, ҳисобни қисқартирди. 67 дақиқада Ризо Асади ҳам ўз номини таблога ёздириб қўйди, ҳисоб 6:1. 

Шу тариқа, Эрон термаси ишончли ҳисобда ғалаба қозонди.