“Челси” Аморимга ёрдам беришни истамади

“Манчестер Юнайтед”ни қабул қилиб олган Рубен Аморим таркибда бир неча ўзгаришлар қилишини билдирган эди.

Хусусан, португалиялик мутахассис ҳужум чизиғига янги ўйинчи олишга уриняпти. Манчестерликлар назарига “Челси” ҳужумчиси Кристоф Нкунку тушди.

27 ёшли футболчи ўзига берилаётган ўйин вақтидан норози ва Лондонни тарк этишга тайёр. У ҳатто “Манчестер Юнайтед”га кўчиб ўтишга ҳам розилик берди.

Football Insider нашрининг маълум қилишича, “Челси” бош мураббий Энцо Мареска Нкункунинг трансферини блоклади. У жамоанинг асосий ҳужумиси Николас Жексон бўлишига қарамай, кўп гол ура оладиган Нкункуни қўйиб юборишни истамади.

“Челси”га 2023 йилнинг ёзида олиб келинган Нкунку жорий мавсумда барча турнирларда 17 маротаба майдонга тушиб, рақиблар дарвозасини 10 маротаба ишғол қилди. Бироқ бу голларининг фақат биттаси Англия Премьер-лигасига тўғри келди холос. Қолган тўплар бошқа турнирларда киритилган.