“Челси” икки нафар қимматбаҳо дарвозабондан воз кечмоқда

“Челси” клуби ёзда жамоа дарвозасини қўриқлашга янги посбон олади. The Telegraph нашри журналисти Мэтт Лоунинг таъкидлашича, клуб раҳбарияти ҳозирги дарвозабонлар Эдуар Менди ва Кепа Аррисабалагага тўлиқ ишонч билдиришга тайёр эмас.

Испаниялик посбон Кепа анча олдин ишончни йўқотиб бўлган. Сенегаллик Менди икки йил олдин унинг ўрнига асосий дарвозабон сифатида олиб келинганди. Менди 2020-2021 йилги мавсумда УЕФА томонидан қитъанинг энг яхши дарвозабони, деб топилган.

Айни пайтда унинг ўйинида ҳам пасайиш кузатилмоқда. Бундан ташқари, 30 ёшли голкипер катта маош талаб қила бошлади.

Бир сўз билан айтганда, ҳар икки дарвозабонга ҳам барқарорлик етишмаётгани уларнинг ўрнига бошқа голкипер олинишига сабаб бўляпти.