Европага йўл олган икки футболчимизни нималар кутмоқда?
Sports.uz портали Ўзбекистон фуболининг янги авлод вакиллари – Садриддин Ҳасанов ва Сайфиддин Содиқов Португалиянинг энг кучли клубларидан ҳисобланган “Брага”га йўл олгани ҳақида маълумот берган эди.
Нуфузли манба – Transfermarkt портали ҳар икки футболчининг “Брага U23” таркибига қўшилганини трансферлар рўйхатида тасдиқлади. Уларнинг янги клубдаги шартномаси ва U23 жамоасига рўйхатдан ўтгани қайд этилган.
Халқаро таҳлилчилар баҳосига кўра, “Брага” иқтидорли ёшларни ривожлантириш бўйича Европадаги энг яхши академик тизимлардан бири ҳисобланади. Футболчиларнинг U23 жамоаси орқали асосий таркибга ўтиши клубдаги одатий йўли саналади. Ўзини кўрсата олган футболчиларга қисқа фурсатда Португалия чемпионатининг юқори дивизионида дебют қилиш имкони берилади.
Хорижлик экспертлар Ҳасанов ва Содиқрв трансферини Ўзбекистон футболчиларига Европа клублари қизиқиши ортиб бораётганининг давоми сифатида эътироф этмоқда. Сўнгги йилларда ўзбек ёшлари халқаро мусобақаларда яхши натижа кўрсатгани Португалия клубларининг ҳам эътиборини тортган.
Таъкидлаш жоизки, ўзбекистонлик иқтидор эгаларини ўз тизимига жалб қилган “Брага” сўнгги 20 йилда нафақат Португалия, балки бутун Европада энг тўғри бошқарилаётган клублардан бири сифатида танилди. Агар илгариги йилларда мамлакат футболи фақат уч гранд – “Бенфика”, “Порту” ва “Спортинг” атрофида айланган бўлса, бугун “Брага”ни кўпчилик Португалиянинг “тўртинчи гранди”, деб атамоқда.
Клуб 1921 йилнинг 19 январида Португалиянинг Брага шаҳрида ташкил этилган. Илк йилларда яшил либосда ўйнаган, аммо 1940-йилларда қизил-оқ формага ўтган. Шунинг учун ҳам клубни “Arsenalistas” (“Арсеналчилар”) деб аташади. Чунки бу жамоа формаси ранглари жиҳатидан Лондоннинг “Арсенал” клубиникига ўхшайди.
2003 йилгача клуб оддий ўртамиёна жамоалардан бири ҳисобланган. Ҳаммаси клуб президентлигига Антониу Салвадор келганидан кейин ўзгарди. Янги раҳбар молиявий тартиб ўрнатди, кучли скаутлар тизимини яратди, академияга катта сармоя киритди, ёш футболчиларни арзон олиб, қимматга сотиш сиёсатини йўлга қўйди ва Европа мусобақалари орқали катта даромад топа бошлади. Натижада “Брага” Португалиянинг энг барқарор клубларидан бирига айланди.
“Брага” ўз тарихи давомида қуйидаги совринларга эришган:
- 3 марта Португалия кубоги соҳиби
- 3 марта Лига кубоги соҳиби
- 2008 йил Интертото кубоги ғолиби (Португалия клублари орасида ягона)
- 2011 йил Европа Лигаси финалчиси
- бир неча марта Чемпионлар Лигаси иштирокчиси.)
Клуб афсоналари:
Рикарду Орта – клуб тарихидаги энг муҳим футболчилардан бири. Сардор сифатида кўп йиллар давомида жамоа етакчиси бўлиб келмоқда.
Алан – “Брага” тарихида энг кўп ўйин ўтказган футболчилардан бири. Мухлислар уни клуб рамзи сифатида қадрлайди.
Угу Виана – Португалия терма жамоасининг собиқ футболчиси. Айни пайтда “Манчестер Сити” спорт директори бўлиб ишлаяпти.
Эдуарду – Португалия миллий терма жамоасининг собиқ асосий дарвозабони.
Академиядан чиққан юлдузлар:
“Брага” академияси ҳозир Европада энг яхшилардан бири сифатида баҳоланади. Бу тизимдан қуйидаги машҳур ўйинчилар етишиб чиққан.
- Франсешку Тринкау – кейинчалик “Барселона”га трансфер қилинган.
- Педру Нету – ҳозирги авлоднинг энг кучли қанот ҳужумчиларидан бири. “Челси”да ўйнаяпти.
- Рожер Фернандес – ҳозирги жамоанинг янги юлдузи.
- Давид Кармо – ўтган ой “Ноттингем Форест”дан “Олимпиакос”га ўтди.
- Витинья – ПСЖ юлдузи, замонавий футболдаги энг зўр ярим ҳимоячиларидан бири.
“Брага” орқали катта футболда ўз ўрнини топганлар:
Қуйидаги футболчилар айнан академия тарбияланувчиси бўлмаса ҳам, “Брага”да янги қирраларини очган ва бу клубдаги ўйинлари уларнинг карьерасида муҳим босқич бўлган:
- Диего Кошта
- Эдер (“ЕВРО-2016” финали қаҳрамони)
- Тиаго Мендеш
- Диего Соуза
Юқоридаги маълумотларни инобатга олиб, экспертлар Садриддин Ҳасанов ва Сайфиддин Содиқов учун бу клубнинг афзаллигини бир неча омиллар билан боғламоқда. Хусусан, “Брага”да ёшларга катта ишонч берилиши, U23 ва ўринбосарлар жамоаси орқали асосий таркибга чиқиш тизими яхши ташкил этилгани, Португалия лигаси Европанинг энг яхши “ривожлантирувчи” чемпионатларидан бири ҳисобланиши, клуб ҳар йили иқтидорли футболчиларни Англия, Испания, Италия ва Германия каби топ-лигалар клубларига трансфер қилиши ўзбек футболчиларининг фойдасига ишлайди.
Агар Ҳасанов ва Содиқов ўзларини кўрсата олса, келажакда уларнинг “Брага”дан Англия Премьер-лигаси, Испания Ла Лигаси ёки бошқа етакчи чемпионатларга йўл олиши учун яхши имконият пайдо бўлади. Бугунги кунда жаҳон футболида “Брага” орқали Европа топ-клубларига йўл олган футболчилар кўпчилик ташкил қилмоқда.
Майдонда очиқ жиноят бўлди. Ўзбекистонлик ҳакам бошқарган учрашувни танқид қилишди
Ҳусановдан катта фойда кўрган “Ланс” яна бир ўзбек футболчисини олмоқчи
Ўзбекистон футболчиси мундиалдаги омадсизликдан кейин терма жамоадан кетди
Ўзбекистоннинг мағлубиятдан кейинги иши мексикаликларни ҳайратга солди
Фикрлар