"Челси" МЮ футболчисидан тезроқ қутулмоқчи

"Челси" Жейдон Санчони ҳаракатларидан қониқмади ва уни МЮга қайтариб юбормоқчи. Футболчи ўтган йилнинг ёзги трансферлар ойнасида ижара асосида "Манчестер Юнайтед"дан "Челси"га ўтган эди.

Келишувда маълум шартлар асосида 25 миллион фунт стерлинг (тахминан 30 миллион евро) эвазига мажбурий сотиб олиш банди мавжуд эди. "The Mirror" нашрининг хабар беришича, "Челси" Санчони мажбурий сотиб олишдан воз кечиш учун 5 миллион фунт стерлинг (тахминан 6 миллион евро) миқдорида жарима тўлашга тайёр.

"Челси" сафида 25 ёшли Санчо 39 та ўйинда иштирок этиб, 4 та гол урди ва 10 та голли узатмани амалга оширди. Ҳозирги вақтда "Челси" Англия чемпионати турнир жадвалида бешинчи ўринни эгаллаб турибди.