“Челси” ўйинчисини бошқа жамоага кузатиб қўйди

“Чарльтон” клубининг расмий сайти жамоага “Челси” вакили Хуан Кастильо келиб қўшилгани ҳақида ахборот тарқатди.

“Чарльтон” истеъдодли ёш футболчини мавсум охирига қадар ижарада ўйнатадиган бўлди.

Хуан Кастильо бир неча йил олдин Лондонга келиб, “аристократлар”нинг ёшлар таркибида ўйнаётган эди. Чап қанот ҳимоячиси бўлган футболчининг асосий таркибга кириш имконияти деярли йўқ. Шу боис, клуб мутасаддилари уни ижарага жўнатиб юборди.

Кастильо жорий мавсумнинг биринчи ярмини ҳам ижара асосида “Бирмингем”да ўтказди. Бу жамоада атиги бешта ўйинда қатнашган футболчи белгиланган даражада етарли ўйин амалиётига эга бўлмагани боис, ортга қайтарилган эди.

Энди у бор маҳоратини “Чарльтон” жамоаси сафида кўрсатади.