“Челси” қайсар юлдузга қаттиқ талаб қўйди

“Челси” раҳбарияти ва клуб тарбияланувчиси Конор Галлахер муносабатлари таранглашиб бормоқда. 

“Аристократлар” молиявий фэйр-плейни бузмаслик учун Конорни сотиб юборишга ҳаракат қиляпти.

Иқтидорли ҳужумкор футболчига талабгорлар ҳам етарли. Хусусан,  “Атлетико” Конорни Мадридга олиб кетиш бўйича “Челси” билан келишиб бўлган. Бироқ футболчининг ўзи жавобни айтишни пайсалга соляпти.

Бу ҳолат “Челси” хўжайинларига ёқмади. Улар Галлахердан ёки Мадридга кетиш, ё клуб билан уларнинг шартлари асосида янги битим тузишни талаб қилмоқда. Агар ўйинчи икки вариантдан бирини танламаса, ўринбосарлар таркибига жўнатилиб, мавсумни ўша ерда ўтказади.

Аслида Галлахернинг амалдаги шартномаси келаси ёз якунланади. Лондонликлар қимматбаҳо ўйинчининг эркин агент сифатида бепул кетиб қолишининг олдини олишга ҳаракат қилмоқда.