Ҳусанов Испания, Франция, Португалия ва Грецияда ўйнайди

2026/2027 йилги УЕФА Чемпионлар лигаси асосий босқичига ташланган қуръага кўра, бош мураббий Энцо Мареска ва «Манчестер Сити» футболчилари гуруҳдаги ўз рақибларини билиб олди

Энцо Мареска «Манчестер Сити» тарихида Чемпионлар лигаси совринини «Этихад» стадионига атиги иккинчи марта олиб келишга интилади. Бунинг аввалгиси 2022/2023 йилги мавсумда содир бўлган — ўшанда жамоа қитъа треблини қўлга киритган эди.

Италиялик мутахассис ўша тарихий мавсумда Пеп Гвардиоланинг ёрдамчи мураббийи бўлган. Энди эса Гвардиола клубни тарк этганидан кейин у «Манчестер Сити» бош мураббийи лавозимини эгаллаган.

«Манчестер Сити» Мареска қўл остидаги янги даврини бир неча ҳафта аввал Англия Суперкубоги учрашувида «Арсенал»га қарши мағлубият билан бошлади. Премьер-лига чемпиони «шаҳарликлар»ни 3:0 ҳисобида йирик мағлубиятга учратиб, «Этихад» раҳбариятига ўзининг жиддий нияти борлигини кўрсатди.

Ўтган ҳафта Мареска шогирдлари 2026/2027 йилги Премьер-лиганинг биринчи турида «Борнмут»га қарши ўйинда мағлубият ёқасида қолди. Бироқ Марк Гехи ва Йошко Гвардиолнинг кечки голлари эвазига «Сити» 2:1 ҳисобидаги қийин ғалабани қўлга киритиб, мағлубиятдан қутулиб қолди.

«Манчестер Сити»нинг 2026/27 йилги УЕФА Чемпионлар лигаси лига босқичидаги рақиблари:

• «Пари Сен-Жермен» — уйда
• «Барселона» — сафарда
• «Спортинг» (Лиссабон) — уйда
• «Порту» — сафарда
• «Наполи» — уйда
• «РБ Лейпциг» — сафарда
• «АЕК Афина» — уйда
• «Ланс» — сафарда

Лига босқичининг дастлабки ўйинларида «Манчестер Сити»нинг собиқ футболчилари Родри ва Кевин Де Брюйне билан яна тўқнаш келиш имконияти пайдо бўлди.

Родри ўтган ҳафта «Барселона»га 65,4 миллион фунт стерлинг эвазига трансферини якунлади ва лига босқичининг 2-турида «Камп Ноу»да 2023 йилда тарихий треблни биргаликда қўлга киритган собиқ жамоаси — «Манчестер Сити»га қарши майдонга тушишга тайёргарлик кўрмоқда.

Кевин де Брюйне эса, Манчестер суперклубидаги тўққиз йиллик фаолиятидан кейин Италиянинг «Наполи» жамоасидан қўним топди. 

Умумий босқичда манчестерликларнинг асосий рақиби «Пари Сен-Жермен» ҳисобланади. Парижликлар Европа чемпионлар лигасининг амалдаги ғолиби сифатида жуда катта қудратга эга. 

Экспертларнинг таъкидлашича, Мареска «Этихад»даги мураббийлик фаолиятини Европа клублар мусобақасида «Сити»нинг сўнгги натижаларини яхшилашдан бошлашни жуда хоҳлайди. Жамоа сўнгги икки марта Чемпионлар лигасининг плей-офф босқичида Мадриднинг «Реал» клубига мағлуб бўлиб, мусобақани эрта  тарк этган.

Турнирнинг умумий босқичи 8 сентябрда старт олади ва 27 январга қадар давом этади. Асосий босқичда жами 36 та клуб иштирок этади. Уларнинг энг яхши саккизтаси тўғридан-тўғри 1/8 финалга йўл олади. 9–24-ўринларни эгаллаган жамоалар эса 1/16 финал босқичида куч синашади.

Беҳруз Каримов Европадаги фаолиятини катта муваффақият билан бошлади

Шов-шувли трансферлар оқибати: “Сити” чиғириғидан фақат Ҳусанов ўтди!

Ҳусанов собиқ жамоаси "Ланс"га, Раҳмоналиев ўзи орзу қилган "Барселона"га қарши ўйнайдиган бўлди