"Челси" собиқ ҳужумчиси учун 100 миллион евродан ҳам кўпроқ тўлашга тайёр

“Интер” ҳужумчиси Ромелу Лукаку яна “Челси”га қайтиши мумкин. Calciomercato.com нашрининг ёзишича, “аристократлар” мавсумлар оралиғида бельгиялик тўпурарни таркибга қўшиб олишни режа қилмоқда.

Юқоридаги манбага кўра, 27 ёшли футболчи “Челси” хўжайини Роман Абрамовичнинг шорт-листида “Боруссия” ҳужумчиси Эрлинг Холанддан сўнг иккинчи ўринда турибди. Лондон гранди Ромелунинг трансфери учун “нерадзуррилар”га 100 млн евродан кўпроқ маблағ таклиф қилишга тайёр.

Серхио Агуэрога ўринбосар қидираётган “Манчестер Сити” ҳам Лукакуни кўз остига олиб қўйган. Аммо “Интер” раҳбарияти ҳам, бош мураббий Антонио Конте ҳам Лукакунинг сотилишини хоҳламаяпти.

Лукаку “Челси” учун бегона эмас. У 2011-2014 йилларда ҳам ушбу жамоа шарафини ҳимоя қилган. "Аристократлар" шундан сўнг уни 28 млн фунт эвазига "Эвертон"га сотиб юборган эди.

Ромелу жорий мавсум А Серияда 27 та ўйинда майдонга тушди ва ўз ҳисобига 20 та гол ҳамда 8 та голли узатма ёздириб қўйди. Унинг "нерадзуррилар" билан амалдаги шартномаси 2023 йилга қадар имзоланган.