“Челси” тўққизта ўйинчидан қутилди. Яна 13 тасига жамоа қидириляпти

“Челси” кейинги йилларда қаторисига ўйинчи сотиб олишга берилиб кетди. Натижада клубда ортиқча футболчилар тўпланиб қолди.

The Athletic нашри август ойи ўрталарида клубда 53 нафар чарм тўп усталари борлигини ҳисоблаб чиққан эди. Қисқа фурсатда улардан тўққиз нафари трансфер қилинди.

Конор Галлахер, Диего Морейра ва Мэйсон Бёрстоу тўлиқ сотиб юборилган бўлса, Лесли Угочукву, Алфи Гилкрист, Кейлеб Уайли, Башир Хамфрис, Гэбриел Слонина ва Аарон Ансельмино ижарага жўнатилди.

Ёзги трансферлар ойнаси ёпилгунича клубдан кетадиган бир гуруҳ ўйинчиларнинг тақдирини ҳал қилиш керак. Улар орасида клубнинг иқтидорли ёш тарбияланувчиларидан тортиб, жаҳон футболида номи чиққан ўйинчиларгача бор.

Хусусан, Ромелу Лукаку, Раҳим Стерлинг, Кепа Аррисабалага, Бен Чилуэлл, Трево Чалоба, Армандо Бройя, Тино Анджорин, Карни Чуквуэмека, Аксель Дисаси, Дейвид Вашингтон, Жорже Петрович, Чезаре Казадей, Датро Фофана каби футболчилар ўзига янги жамоа топиши керак.