“Челси”даги машҳур юлдуз ўзига бошқа жамоа танлади

Жорий мавсумнинг биринчи ярмида жамоадан четда қолиб кетган “Челси” футболчиси Раҳим Стерлинг январь ойида ўзига иш топишга ҳаракат қилмоқда.

Sky Sports тасдиқлашича, яқинда “Вест Хэм” Стерлингни ижарага олиш бўйича “аристократлар”га сўров юборган, аммо тажрибали футболчи фақат тўлиқ трансфер амалга оширилсагина “Челси”дан кетиши мумкинлигини таъкидлаб, бу чорловни қабул қилмади.

Бундан ташқари, Стерлинг Премьер-лига аутсайдери бўлган “Вест Хэм”га нисбатан барқарор ва хавфсизроқ жамоа изламоқда. Унинг учун энг мақбул вариант  “Фулхэм” бўлиб турибди.

Агар 31 ёшли футболчи бу клуб билан келиша олса, ҳатто Лондондаги уйини ҳам тарк этишига тўғри келмайди.

Бироқ ҳозирча “Фулхэм” ҳафтасига 300 минг фунтдан ортиқ маош оладиган Стерлингни олишга қодирлиги катта шубҳа остида турибди.

Ўтган ёзда “Кристал Пэлас” Рахим Стерлингни олишга қизиқиш билдирган эди, аммо “бургутлар” аллақачон Бреннан Жонсоннинг трансфери бўйича келишувга эришган ва энди Рахимга даъвогар эмас.