Чемпион бўлиш учун 6 қадам қолди ёхуд "Насаф"нинг навбатдаги рақибларга қарши статистикаси қандай?

Ўзбекистон Суперлигасида мавсум якунига яқинлашмоқда.  Аммо бу йил чемпионат олдингиларга қараганда анча қизиқарли ва шиддатли бўлаётганини эътироф этиш керак. 20-турдан кейин олтин медаллар учун 3 та клуб даъвогарлик қилмоқда – “Насаф”, “Пахтакор” ва “Навбаҳор”.

19-турда кўплаб марказий баҳслар бўлиб ўтди. “Навбаҳор” кутилмаганда Тошкентда “Бунёдкор”га имкониятни бой берган бўлса, “Насаф” “Пахтакор”дан устун келган ҳолда чемпионлик учун имкониятини анча яхшилаб олди. Ҳозирда Қарши клуби 41 очко тўплаган ҳолда турнир жадвалида якка пешқадам бўлиб турибди. “Пахтакор” эса 38-очко билан 2-поғонани панд этган. Наманганнинг “Навбаҳор” жамоаси “шерлар”дан 1 очко кам тўплаган ҳолда кучли учликка якун ясаган.

Аввалги мавсумлар билан солиштирганда “Насаф” чемпионлик учун анча яқин келди. Улар қолган 6 баҳсда максимал очколарни тўплай олса, узоқ кутилган олтин медалларга эга чиқиши мумкин. Шу боис, бугун Қарши клубининг навбатдаги турларда дуч келадиган жамоаларга қарши статистикасини келтириб ўтамиз.

9 октябрь
“Насаф” – “Сўғдиёна”

Қаршиликлар учун “Сўғдиёна” анча қулай рақиб ҳисобланади. “Аждарлар”нинг “бўрилар”га қарши баҳслардаги статистикаси жуда яхши. Сўнгги 10 та беллашувни оладиган бўлсак, 7 та ўйинда “Насаф” ғалаба қозонган, 1 беллашув Жиззах клуби фойдасига ҳал бўлган. Яна иккита баҳсда эса ғолиб номи аниқланмаган.

2018 йил
“Насаф” – “Сўғдиёна” 3:0
“Сўғдиёна” – “Насаф” 0:1

2019 йил
“Насаф” – “Сўғдиёна” 3:1
“Сўғдиёна” – “Насаф” 1:1

2020 йил
“Насаф” – “Сўғдиёна” 3:0
“Сўғдиёна” – “Насаф” 3:1

2021 йил
“Насаф” – “Сўғдиёна” 1:0
“Сўғдиёна” – “Насаф” 0:1
“Сўғдиёна” – “Насаф” 1:1

2022 йил
“Сўғдиёна” – “Насаф” 1:2
“Насаф” – “Сўғдиёна” ?

19 октябрь
“Қизилқум” – “Насаф”

Навоий клуби жорий мавсум чемпионатда анча шовқин кўтарди. “Қизилқум” ҳозирда 32 очко билан 5-ўринни банд этган. Чемпионлик учун кураш олиб бораётган “Насаф”ни эса 22-турда яна бир синов кутмоқда. Рўзиқул Бердиев шогирдлари 19 октябрь куни Навоийга сафар қилади. Мазкур жамоаларнинг сўнгги ўйинларида қайд этилган натижаларга қарайдиган бўлсак, катта устунлик “аждарлар” томонда. Охирги 10 та баҳснинг 6 тасида “Насаф” ғалаба қозонган бўлса, 1 беллашув “олтин изловчилар” фойдасига ҳал бўлган. 3 та ўйинда эса томонлар муроса йўлини танлаган.

2018 йил
“Насаф” – “Қизилқум” 0:0
“Насаф” – “Қизилқум” 4:2
“Қизилқум” – “Насаф” 2:0

2019 йил
“Насаф” – “Қизилқум” 1:1
“Қизилқум” – “Насаф” 0:0

2020 йил
“Қизилқум” – “Насаф” 1:3
“Насаф” – “Қизилқум” 4:0

2021 йил
“Қизилқум” – “Насаф” 1:2
“Насаф” – “Қизилқум” 2:1

2022 йил
“Насаф” – “Қизилқум” 5:0
“Қизилқум” – “Насаф” ?

22 октябрь
“Насаф” – “Бунёдкор”

“Бунёдкор” жорий мавсум жуда ёмон ўйин намойиш қилмоқда. Клуб 24-турдан кейин 24 очко тўплаган ҳолда 10-ўринни эгаллаб турибди. 23-тур доирасида эса “қалдирғочлар” Қаршида “Насаф” меҳмони бўлишади. Ушбу жамоаларнинг сўнгги 10 та ўйини натижасига эътибор қаратадиган бўлсак, ўзаро тенгликни кузатишимиз мумкин. 4 та беллашувда “Насаф”нинг, 4 та баҳсда “Бунёдкор”нинг қўли баланд келган. Икки ўйинда эса ғолиб номи аниқланмаган.

2017 йил
“Насаф” – “Бунёдкор” 0:1

2018 йил
“Бунёдкор” – “Насаф” 2:1
“Насаф” – “Бунёдкор” 1:4

2019 йил
“Бунёдкор” – “Насаф” 1:1
“Насаф” – “Бунёдкор” 3:1

2020 йил
“Насаф” – “Бунёдкор” 2:2
“Бунёдкор” – “Насаф” 0:1

2021 йил
“Бунёдкор” – “Насаф” 2:0
“Насаф” – “Бунёдкор” 5:0

2022 йил
“Бунёдкор” – “Насаф” 1:4
“Насаф” – “Бунёдкор” ?

04 ноябрь
“Насаф” – “Динамо”

“Динамо” Про лигага тушиб кетиш арафасида турибди. Самарқандликлар 20-турдан кейин атиги 9 очко тўплаган ҳолди сўнгги поғонани эгаллаб турибди. 24-турда “йўлбарслар”ни яна бир синов кутиб турибди. Ўша куни Абрамов шогирдлари Қаршида “Насаф” меҳмони бўлишади. Ушбу жамоаларнинг сўнгги 10 та ўйини статистикасига қарайдиган бўлсак, 6 та ўйинда “аждарлар”нинг, 1 баҳсда “Динамо”нинг қўли баланд келган. 3 та ўйинда эса дуранг қайд этилган.

2013 йил
“Динамо” – “Насаф” 1:3

2014 йил
“Насаф” – “Динамо” 1:0
“Динамо” – “Насаф” 0:5

2015 йил
“Насаф” – “Динамо” 2:0
“Динамо” – “Насаф” 1:1

2017 йил
“Динамо” – “Насаф” 1:1
“Насаф” – “Динамо” 3:0

2019 йил
“Динамо” – “Насаф” 1:1
“Насаф” – “Динамо” 1:2

2022 йил
“Динамо” – “Насаф” 0:4
“Насаф” – “Динамо” ?

12 ноябрь
“Насаф” – “Нефтчи”

“Нефтчи” Суперлигада қолиш масаласини деярли ҳал қилиб бўлган. Фарғона клуби 20-турдан кейин 25 очко тўплаган ҳолда 8-ўринни эгаллаб турибди. 25-турда “Нефтчи” Қаршига сафар уюштиришига тўғри келади. Мазкур жамоаларнинг биринчи даврадаги учрашувида 1:1 ҳисоби қайд этилган. Шу боис, ушбу ўйин “аждарлар” учун реванш учрашуви сифатида ҳам эътибор марказида бўлади. “Насаф” ва “Нефтчи”нинг сўнгги 10 та ўйини натижаларига қарайдиган бўлсак, 6 та ўйинда қаршиликлар ғалаба қозонган. Фарғона клуби1 баҳсни ўз фойдасига ҳал қилишни уддалаган. 3 та беллашувда эса ғолиб номи аниқланмаган.

2016 йил
“Насаф” – “Нефтчи” 1:0
“Нефтчи” – “Насаф” 2:2
“Насаф” – “Нефтчи” 3:1

2017 йил
“Насаф” – “Нефтчи” 2:0
“Нефтчи” – “Насаф” 0:3

2018 йил
“Нефтчи” – “Насаф” 0:0
“Насаф” – “Нефтчи” 2:0
“Нефтчи” – “Насаф” 3:1
“Насаф” – “Нефтчи” 2:0

2022 йил
“Нефтчи” – “Насаф” 1:1
“Насаф” – “Нефтчи” ?

19 ноябрь
“Олимпик” – “Насаф”

“Олимпик” Суперлигада дебютант бўлса-да, анча мазмунли ўйин кўрсатмоқда. Тимур Кападе бошчилигидаги олимпиячилар гранд клублар учун анча бошоғриқ бўлди. 19 ноябрь куни ушбу клуб ўз майдонида “Насаф”га қарши саф тортади. Агар Қарши клуби мазкур баҳсга қадар максимал очколарни қўлга киритган ҳолда келса, катта эҳтимол билан бу ўйин “Насаф” учун чемпионлик баҳсига айланади. “Насаф” ва “Олимпик” шу пайтга қадар атиги битта расмий ўйинда куч синашган. Суперлига 13-тури доирасидаги беллашувда 2:2 ҳисобидаги дуранг қайд этилган. Шу боис, ушбу ўйин анча қизиқарли ўтишига шубҳа йўқ.

2022 йил
“Насаф” – “Олимпик” 2:2
“Олимпик” – “Насаф” ?

Кузатганингиздек, “Насаф” қолган учрашувларда нисбатан ўзи учун қулай бўлган жамоаларга қарши майдонга тушади. Статистикаларга қарайдиган бўлсак, катта устунлик Рўзиқул Бердиев шогирдлари томонда. Аммо бу билан “аждарлар”нинг имкониятига катта баҳо бермаган бўлардик. Сабаби, бу – футбол ва майдонда ҳамма нарса кузатилиши мумкин.

Жамшидбек Маҳмудов