Чемпионлар лигасида зафар қучган Яхшибоев жамоаси ҳақида антиқа маълумот

Жасур Яхшибоев 15 сентябрь куни Молдованинг “Шериф” жамоаси таркибида Чемпионлар лигаси гуруҳ босқичида дебют қилиб, Европанинг энг нуфузли турнирида иштирок этган камсонли ўзбекистонлик футболчилардан бирига айланди. Аввал, бу турнирда асосан Максим Шацких порлаган ва  ўз голлари билан “Динамо Киев” ғалабаларига муносиб ҳисса қўшган.

Европа футболи мутахассислари айни пайтда биринчи турда сенсацияга сабаб бўлган мусобақа дебютантини синчковлик билан ўрганиб чиқмоқда. Бунга етарлича асос бор.

“Шериф” Молдова футболи тарихида биринчи марта Европа Чемпионлар лигасининг гуруҳ босқичига йўлланма олди. Айрим европалик футбол экспертлари қитъанинг энг катта турнири гуруҳ баҳслари бошланиши олдидан тирасполликларни мусобақанинг энг заиф жамоаси, деб атади ва бу жамоани ҳеч ким менсигани йўқ.

Жамоанинг украиналик бош мураббийи Юрий Вернидубнинг шогирдлари ҳар қандай рақибга қарши ўйнашга тайёр экани, тезкорлик ва маҳорат бобида бошқалардан қолишмаслиги, мураббийлар штаби кучли рақобатчилар билан қандай ўйнашни яхши билиши ҳақидаги гапларини ҳеч ким жиддий қабул қилгани йўқ, албатта.

Лекин “Шериф” илк уринишдаёқ, Еврокубокларда катта тажриба тўплаган Донецкнинг “Шахтёр” клубини 2:0 ҳисобида ер тишлатганидан кейин кўплаб мухлису мутахассислар эътибори бу клубга қаратилди.

Ўзбекистонлик футбол ихлосмандлари эса, “Шериф” ўйинларини Жасур Яхшибоев учунгина кузатиб боради. Бизга ўзбек йигити футбол оламининг энг нуфузли турнирларида тўп тепиши, бу орқали янада кучли жамоалар ва лигаларга ўтиш имкониятини қўлга киритиши аҳамиятли.

Хуллас, “Шериф”нинг ғалабаси Молдова футболининг улкан ютуғи сифатида қабул қилинди. Бироқ, энг қизиқ томони шундаки, бу ғалабага бирорта молдован футболчисининг ҳиссаси қўшилгани йўқ. Бунга хорижлик мутахассислар алоҳида эътибор қаратди.

Демак, “Шериф” ғалабасини таъминлаган қаҳрамонлар ва улар қайси мамлакатдан экани билан танишамиз.

 Айтилганидек, учрашувга футболчиларни тўғри тайёрлай олган ва ажойиб тактика танлаган бош мураббий Юрий Вернидуб мағлуб этилган “Шахтёр” жамоаси келган мамлакат – Украинадан.

Ўйинда илк дақиқадан ўйнаган бошланғич таркибдаги 11 нафар ўйинчининг барчаси хорижлик: Гиоргос Афанасиадис (Греция), Данило Арболеда (Колумбия), Адама Траоре (Мали), Франк Кастаньеда (Колумбия), Фернандо Пейшото (Бразилия), Кристиано Да Силва (Бразилия), Жасур Яхшибоев (Ўзбекистон), Эдмунд Аддо (Гана), Дмитрис Коловос (Греция), Себастьян Тилль (Люксембург), Густаво Дуланто (Перу / Италия).

Ўйин давомида захирадан майдонга тушган тўрт нафар футболчининг ҳам Молдова фуқаролигига ҳеч қандай алоқаси йўқ.

Яна бир маълумот. “Шериф” Чемпионлар лигасининг саралаш босқичидаги муваффақияти учун мусобақа ташкилотчиси УЕФА томонидан 16 миллион евро билан тақдирланган. Аввалроқ, тирасполликлар биринчи турдаги ғалаба эвазига 2,8 миллион евро билан тақдирлангани ҳақида хабар берган эдик.

Қизиқарли маълумотларнинг Жасурга тегишли жойи ҳам бор. “Шериф” Яхшибоев билан тенгдош клуб ҳисобланади. Ҳамюртимиз 1997 йилнинг 24 июнида туғилган. Тирасполь клуби эса шу йилнинг 7 апрелида ташкил қилинган.

Чемпионлар лигасининг дастлабки туридан сўнг “D” гуруҳида пешқадамлик қилаётган “Шериф” иккинчи тур учрашувини машҳур “Сантьяго Бернабеу” аренасида ўтказади.

Биз 28 сентябрь куни Мадридда бўладиган беллашувда Жасур Яхшибоев “Реал”га қарши ўзини кўрсата олишига умид қиламиз!

Яхшибоевни УЕФА Чемпионлар лигаси гуруҳ босқичида дебют кутмоқда! У турнирнинг энг заиф жамоасини “Шахтёр”, “Реал” ва “Интер”дан қутқара оладими?

Шомуродовга муносиб баҳони Рим халқи берди ва Элдор ўз фикрини билдирди!

Европа томонлардаги легионеримизнинг голи муҳим ғалаба келтирди