Coca Cola Суперлига. 13-турнинг 3 учрашуви майдонлари ўзгарди

Coca Cola Суперлига 13-туридан жой олган 3 та учрашувда рақиблар майдон масаласида ўзаро келишувга эришди, ЎзПФЛ эса уларнинг таклифини қаноатлантирди.  

28 август куни “Навбаҳор” ва “Қўқон-1912” клублари Бекободда куч синашиши керак эди. Марказлаштирилган мусобақа давомидаги футболчиларнинг жисмоний ҳолатлари инобатга олиниб, учрашув нисбатан яқинроқ бўлган “Жар” стадионига кўчирилди. 

29 август куни “Бухоро” ва АГМК клублари “Бунёдкор” стадионида куч синашишлари керак эди. Аммо Тошкентдаги ёғингарчилик “Бунёдкор” майсаси масаласида саволлар пайдо қилган, натижада стадион бош директори майдонни авайлаш масаласида расмий сўров билан чиқди. Шундан келиб чиқиб, учрашув “Локомотив” стадионига кўчирилди.

Шунингдек, 29 августда ўтиши керак бўлган “Металлург” — “Машъал” учрашуви ТТЙМИ стадионидан “Жар” стадионига кўчирилди.