Даврон Файзиев: Бошқа ташкилотларни билмадиму, мен унга "Олтин тўп"ни бериб бўлганман

"Севилья" - "Реал" баҳсида мадридликлар камбэк намойиш этиб, ғалаба қозонди. Таниқли шарҳловчи Даврон Файзиев телеграмдаги саҳифасида учрашувдан кейинги фикрларини ёзиб қолдирди. 

- Уикенднинг марказий учрашувида "Севилья" ва "Реал Мадрид" тўқнаш келди. Ракитич ва Ламеланинг голларидан сўнг, "Севилья" биринчи бўлимни ўз фойдасига ҳал этди. Лекин "Реал" бу мавсумда камбэклар қиролига айланди, бошқачасига иложи йўқ шекилли. Карло Анчелоттининг ўзгаришлари тезкор ишлаб кетди. 45-дақиқада тушган Родриго 5 дақиқадан кейин гол урди. 81-дақиқада ўйинга қўшилган Начо 1 дақиқада дарвозани ишғол қилди. Охирида эса, мавсум қаҳрамони Карим Бензема сўнгги ўқни узди, 3:2. "Севилья" ўз уйида мавсумда биринчи бор ютқазди.

Карим Ла Лигадаги 25-голини урди ва бу шахсий рекорди. Умумий мавсумда 39 ўйин, 39 гол, 14 ассист. Бошқа ташкилотларни билмадиму, мен унга "Олтин тўп"ни бериб бўлганман.

Ла Лигадаги вазият, "Реал"нинг "Барселона" билан фарқи 15 очко. Бироқ "Барса" захирасида иккита учрашув бор. Бугун ва кейин ўша ўйинларни ютса, фарқ 9 очкони ташкил этади. Чемпионат тугашига 6 тур қолади, - деди Даврон Файзиев.