Даврон Файзиев: Бу ўйин аввалги турларда "Реал" ростдан ҳам мотивация етишмаслигидан очко йўқотдими ёки муаммолар жиддийроқ ва кенгроқми, шуни аниқлаб беради

Бугун ЕЧЛда ажойиб ўйин бўлиб ўтади. "Интер" Мадридда "Реал" меҳмони бўлади. Беллашув ҳар икки жамоа учун жуда аҳамиятли. Сабаби томонлар турнир жадвалида охирги ўринларда бормоқда. Вазиятга таниқли шарҳловчи Даврон Файзиев телеграмдаги саҳифасида муносабат билдириб, учрашувнинг қиймати ҳақида сўз юритди.

- "Реал" – "Интер" ўйини, қуръадан сўнг, гуруҳда биринчи ўрин учун кечиши тахмин қилинганди. Ҳозир эса вазият бошқачароқ. "Интер" учинчи, "Реал" эса тўртинчи ўринда. Бу баҳсда мағлуб бўлгани "В" гуруҳида мутлақ аутсайдерга айланади. Тасаввур қилинг. "Шахтёр" ва "Боруссия М" билан бир гуруҳда "Реал" ва "Интер" қолиб кетиш эҳтимоли ошмоқда. Улар ниҳоят биринчи ғалабага эришиш учун ўйнамоқда. Дуранг қониқтирмайди. Бу вазиятнинг плюс томони ҳам бор. Агар 2 та турда 6 очкодан олганда, бу грандлар бугун жанг намойиш этмаслиги, куч тежаши мумкин эди. Эндиги вазиятда ортга йўл йўқ, биз "Реал Мадрид" ва "Интер" иштирокидаги кичик финалга гувоҳ бўламиз. Яна бир масалага ойдинлик киритилади. Зинедин Зиданда кучсизроқ клублар билан ўйинда мотивация бериш билан муаммолар бор, дейилади. Хўп, "Шахтёр" ва "Боруссия М" билан шундай бўлгандир, "Интер" топ ва мотивация максимал даражада бўлиши аниқ. Бу ўйин аввалги турларда "Реал" ростдан ҳам мотивация етишмаслигидан очко йўқотдими ёки муаммолар жиддийроқ ва кенгроқми, шуни аниқлаб беради. "Интер"да эса тескари вазият, Антонио Конте шогирдлари Италияда айнан бевосита рақобатчилари устидан ғалабага эриша олмаяпти. Бунга яна чемпионлар лигасидаги қоқилишлар қўшилди ва "Интер" мухлислари Контега сал ўқрайиб қарашни бошлашяпти. Натижа йўқ.

Мана, қанчалик бу учрашув кўп нарсани ҳал қилишини билиб олдик. Энди тунги соат 01:00гача ухлаб қолмасликни уддаласангиз, Европа классикаси даражасидаги супер ўйинга гувоҳ бўласиз, - деди Даврон Файзиев.