Дембеле, Дюплантис, Алкарас ва Синнер 2025 йилнинг энг яхши спортчиси учун "Laureus" мукофотига даъвогарлик қилмоқда

“Laureus” талқини бўйича "Йил спортчиси" совринига асосий даъвогарлар рўйхати эълон қилинди. Мазкур мукофот ўтган йилги натижаларга асосланган ҳолда спортчиларга топширилади.

Тақдирлаш маросими 20 апрель куни Мадридда бўлиб ўтади.

Эркаклар ўртасида "Йилнинг энг яхши спортчиси" номинациясида ПСЖ вингери Усмон Дембеле, теннисчилар Карлос Алкарас ва Янник Синнер, словениялик велопойгачи Тадей Погачар, испаниялик мотопойгачи Марк Маркес ва ўтган йили совринни қўлга киритган швециялик лангарчўп билан сакровчи Арман Дюплантис даъвогарлик қилмоқда.

Аёллар ўртасида "Барселона" ва Испания терма жамоаси футболчиси Аитана Бонмати, беларуслик теннисчи Арина Соболенко, америкалик сузувчи Кетлин Ледеки ва уч нафар енгил атлетикачи - кениялик Фейт Кипегон, шунингдек, АҚШ вакиллари Сидней Маклафлин-Леврон ва Мелисса Жефферсон-Вуден мукофотга даъвогарлик қилмоқда.